آئی سی سی ’ٹیسٹ پلیئر آف دا ایئر‘ کون ہوگا؟

بین الاقوامی کرکٹ کونسل (آئی سی سی) نے مردوں کی کیٹیگری میں ’ٹیسٹ پلیئر آف دا ایئر‘ ایوارڈ کے لیے چار کھلاڑیوں کو نامزد کیا ہے اور ان چار ناموں میں کوئی پاکستانی کھلاڑی شامل نہیں ہے۔

نامزد کیے جانے والے کھلاڑیوں میں انگلینڈ کے ٹیسٹ کیپٹن جو روٹ، انڈین سپنر روی چندرن ایشون، نیوزی لینڈ کے فاسٹ بولر کائل جیمی سن اور سری لنکا کے بیٹسمین دیمتھ کرونارتنے شامل ہیں۔

بات کی جائے جو روٹ کی تو انہوں نے رواں سال ٹیسٹ میچوں میں رنز کا انبار لگادیا ہے۔ انگلینڈ کے کپتان نے اس سال 15 میچ کھیلے اور چھ سینچریوں کی مدد سے 1708 رنز بنائے۔

انڈین سپنر ایشون نے 2021 میں 8 ٹیسٹ میچ کھیل کر 52 وکٹیں حاصل کیں اور انگلینڈ کے خلاف ایک سینچری بھی سکور کی۔

نیوزی لینڈ کے فاسٹ بولر کائل جیمی سن نے پانچ ٹیسٹ میچ کھیلے اور 27 وکٹیں حاصل کیں۔

لسٹ میں شامل چوتھے اور آخری کھلاڑی سری لنکا کے بیٹسمین دیمتھ کرونارتنے ہیں جنہوں نے سات ٹیسٹ میچوں میں 69.38 کی اوسط سے 902 رنز بنائے۔ انہوں نے ٹیسٹ میچوں میں 2021 میں چار سینچریاں بھی سکور کیں۔

آئی سی سی کی ووٹنگ اکیڈمی جس میں کرکٹ کے بین الاقوامی صحافی اور براڈکاسٹرز شامل ہیں ووٹنگ کے ذریعے ٹیسٹ پلیئر آف دا ایئر کا انتخاب کریں گے۔

آئی سی سی اپنے ڈیجیٹل پلیٹ فارمز سے کرکٹ مداحوں کو بھی ووٹنگ کا حق دے گا اور ٹیسٹ پلیئر آف دا ایئر کے انتخاب کے وقت مداحوں کے ووٹوں کو بھی مدنظر رکھا جائے گا۔