کیا پانچ روسی طیارے ایک یوکرینی پائلٹ نے گرائے؟

مہینوں پر محیط کشیدگی کے بعد گزشتہ ہفتے روس کے صدر ولادیمیر پوتن نے یوکرین میں ’سپیشل ملٹری آپریشن‘ کا اعلان کیا تھا جس کے بعد ان دونوں ممالک کے درمیان جنگ اب بھی جاری ہے۔

جنگی حالات میں لوگوں کو گمراہ کرنے کے لیے غلط معلومات بھی سوشل میڈیا پر شیئر کی جاتی ہیں۔ یوکرین پر روسی حملے کے بعد بھی ایسی ہی کچھ ویڈیوز سوشل میڈیا پر وائرل ہوئی ہیں جن کا حقیقت سے کوئی تعلق نظر نہیں آتا۔

چوبیس فروری کو یوکرینی فوج کی جانب سے ایک بیان جاری کیا گیا تھا جس میں دعویٰ کیا گیا تھا کہ ان کی جانب سے پانچ روسی لڑاکا طیارے اور ایک ہیلی کاپٹر لوہانسک ریجن کے اوپر مار گرائے ہیں۔

تاہم ان طیاروں اور ہیلی کاپٹر کو کتنے یوکرینی پائلٹس نے گرایا تھا، اس حوالے سے کوئی معلومات سرکاری طور پر مہیا نہیں کی گئی۔

اسی دوران سوشل میڈیا پر کئی صارفین کی جانب سے ایک ویڈیو شیئر کی گئی جس کے ذریعے دعویٰ کیا گیا کہ یوکرینی ایئر فورس کے ایک مگ 29 طیارے نے روس کے جدید ایس یو35 طیارے کو یوکرینی دارالحکومت کیف کے اوپر مار گرایا ہے۔

اس فائٹر پائلٹ کو کئی سوشل میڈیا صارفین ’گھوسٹ آف کیف‘ یعنی ’کیف کا بھوت‘ قرار دے رہے ہیں۔

تاہم اس ’گھوسٹ آف کیف‘ کے حقیقی کردار ہونے کے شواہد آزاد ذرائع ابلاغ میں کہیں نظر نہیں آتے۔

خبر رساں ادارے روئٹرز کے مطابق اب تک لاکھوں مرتبہ دیکھی جانے والی ویڈیو کا دراصل حقیقت سے کوئی تعلق نہیں بلکہ یہ ایک ویڈیو گیم کا کلپ ہے۔

یہ ویڈیو سب سے پہلے یوٹیوب پر ’کامریڈ کارب‘ نامی اکاؤنٹ سے شیئر کی گئی تھی جس کے ٹائٹل میں صاف لکھا تھا کہ یہ ویڈیو ’ڈی سی ایس ورلڈ‘ نامی گیم سے لی گئی ہے۔

یوٹیوب پر ویڈیو شیئر کرنے والے صارف نے مزید لکھا تھا کہ یہ ویڈیو ’گھوسٹ آف کیف‘ کو خراج تحسین پیش کرنے کے لیے لگائی جارہی ہے۔

انہوں نے لکھا ’اگر وہ اصلی ہیں تو خدا ان کی مدد کرے اور اگر وہ کوئی افسانہ ہیں تو میں انہیں حقیقت ہوتا دیکھنا چاہتا ہوں۔‘