مدثر نارو کیس، ہائی کورٹ نے مسنگ پرسنز کمیشن کی رپورٹ طلب کرلی

اسلام آباد ہائی کورٹ نے صحافی مدثر نارو و دیگر لاپتا افراد کے بازیابی سے متعلق کیس میں فیڈرل ٹاسک فورس آن مسنگ پرسنز سے رپورٹ طلب کر لی ہے۔

جمعے کو ہونے والی سماعت میں درخواست گزاروں کے وکلا شاہ خاور، ایمان مزاری، عثمان وڑائچ، کرنل انعام الرحیم اور دیگر عدالت میں پیش ہوئے۔

دوران سماعت چیف جسٹس اطہر من اللہ نے استفسار کیا کہ فیڈرل ٹاسک فورس آن مسنگ پرسنز کی رپورٹ کس کے پاس ہوتی ہے۔

جس پر وکیل فیصل صدیقی نے بتایا کہ فیڈرل ٹاسک فورس آن مسنگ پرسنز کی رپورٹ وزارت داخلہ کے پاس ہوتی ہے۔

اس کے بعد عدالت نے وفاقی حکومت سے فیڈرل ٹاسک فورس آن مسنگ پرسنز کی رپورٹ طلب کرلی اور ہدایت کی کہ سیکریٹری داخلہ لاپتا افراد کے حوالے سے وزیراعظم اور وفاقی کابینہ سے ہدایات لے کر عدالت کو جمع کرائیں۔

عدالت میں موجود لاپتا صحافی مدثر نارو کی والدہ نے کہا کہ ’مائیں ہمشیہ بچوں کو سچ کا ساتھ دینے کا کہتی ہیں۔ اگر میرے بیٹے نے کچھ غلط کیا ہے تو سامنے لایا جائے۔‘

مدثر نارو کی والدہ نے عدالت کو بتایا کہ ’ہم نے حقیقت پر مبنی اطلاعات وزیراعظم اور کمیشن کی دی ہوئی ہیں۔‘ جس پر عدالت نے سیکریٹری داخلہ سے آئندہ سماعت پر تفصیلی رپورٹ طلب کر لی۔

لاپتا افراد کی جائیداد کی منتقلی کا معاملہ

آمنہ مسعود جنجوعہ نے عدالت کی توجہ لاپتا افراد کی جائیداد کی منتقلی کے مسئلے کی جانب دلاتے ہوئے کہا لاپتا افراد کے خاندانوں کو پراپرٹی کا قبضہ نہیں دیا جا رہا۔ 

عدالت نے لاپتا افراد کی جائیداد سے متعلق وزارت قانون سے جواب طلب کر لیا اور آمنہ مسعود جنجوعہ کو اپنی تجاویز تحریری طور پر جمع کرانے کی ہدایت کی۔

عدالت نے کیس کی سماعت 17 مئی تک کے لیے ملتوی کر دی۔