دی لیجنڈ آف مولا جٹ کی ریلیز آج، ’اتنا بے چینی سے کبھی کسی فلم کا انتظار نہیں کیا‘

پاکستانی فلم دی لیجنڈ آف مولا جٹ کے لیے شائقین کا طویل انتظار ختم ہونے کو ہے کیونکہ ایکشن اور تھرلر سے بھرپور پنجابی فلم آج جمعرات کو ریلیز ہونے جا رہی ہے۔

فلم دی لیجنڈ آف مولا جٹ 1979 میں ریلیز ہونے والی پنجابی فلم مولا جٹ کا نیا روپ ہے جس کی کاسٹ میں فواد خان، حمزہ علی عباسی، ماہرہ خان، ہمائمہ ملک، گوہر رشید اور شفقت چیمہ شامل ہیں۔

دی لیجنڈ آف مولا جٹ پاکستانی فلم انڈسٹری کے بڑے بجٹ کی بڑی ایکشن فلم ہے جس کی کہانی پنجاب میں رہنے والے مولا جٹ اور اس کے حریف نوری نت کے گرد گھومتی ہے۔

یہ اپنی نوعیت کی انوکھی فلم ہے جو ٹیکنالوجی اور پنجابی ورثے کا امتزاج ہے۔

فلم کے ہدایتکار بلال لاشاری کہتے ہیں کہ ’دی لیجنڈ آف مولا جٹ نازک دل کے افراد اور بچوں کے لیے نہیں ہے، فلم میں کچھ ایسے خوفناک مناظر ہیں جنہیں والدین اپنے بچوں کو دکھانا نہیں چاہیں گے تو میں بچوں کو سینما لے کر جانے میں حق میں نہیں ہوں۔‘

فلم میں مولا جٹ کا کردار ادا کرنے والے فواد خان کی یہ 15 سال بعد پہلی فلم ہوگی۔ اس سے پہلے فواد خان 2007 میں ریلیز ہونے والی سپر ہٹ فلم ’خدا کے لیے‘ کا حصہ تھے۔

اسی سلسلے میں سپر سٹار فواد خان کہتے ہیں کہ ’فلموں کا سلسلہ رک گیا تھا، میں ملک سے باہر (بالی وُڈ) چلا گیا۔ پھر یہ فلم 2016 میں بنانا شروع کی تھی جو 2017 میں مکمل ہوئی۔‘

دوسری جانب فلم کے نوری نت حمزہ علی عباسی چار سال بعد بڑے پردے پر واپس آئے ہیں۔

حمزہ علی عباسی آخری بار 2018 میں فلم ’جوانی پھر نہیں آنی‘ اور ’پرواز ہے جنون‘ میں اداکاری کرتے دکھائی دیے گئے۔

فلم دی لیجںڈ آف مولا جٹ 2017 میں مکمل کرلی گئی تھی تاہم 1979 میں سلطان راہی اور مصطفیٰ قریشی کی فلم مولا جٹ کے میکرز نے فلم پر کاپی رائٹس چرانے کا الزام لگا دیا تھا جس کے بعد فلم کو ریلیز کرنے لیے 5 سال کا طویل انتظار کرنا پڑا۔

دی لیجنڈ آف مولا جٹ کی ریلیز سے پہلے ہی سماجی رابطوں کی ویب سائٹ ٹوئٹر پر بھی فلم بینوں میں جوش و خروش دیکھنے میں آیا۔

ٹوئٹر صارف احمد شیخ کہتے ہیں کہ ’کیا یہ ممکن ہے کہ یہ پیٹیشن ڈالی جائے کہ 13 اکتوبر کو قومی تعطیل ہو؟ مولا جٹ دیکھنی ہے۔‘

صارف مناہل لکھتی ہیں کہ ’میں کبھی بھی ان میں سے نہیں رہی ہوں جنہیں فلم کی ریلیز سے پہلے بے چینی سے انتظار ہو۔ میں دی لیجنڈ آف مولا جٹ کے لیے بہت پرجوش ہوں۔ امید کرتی ہوں یہ ایک اچھی تفریح ہوگی۔‘

ریڈیو پروگرام کی میزبان صباح بانو ملک نے ٹویٹ کیا کہ ’میں کسی سے پوچھوں گی کہ میرے آباؤ اجداد کی خاطر کوئی اگر میرے ساتھ مولا جٹ فلم دیکھے۔‘

ایک اور صارف فریحہ نے لکھا کہ 'آخر کار وہ وقت آگیا جس کا انتظار تھا، مولا جٹ کو سکرین پر دیکھنے کے لیے بے تاب ہوں، مزید انتظار نہیں ہو رہا۔‘

سنہ 1979 میں ریلیز ہونے والی مولا جٹ میں نوری نت کا کردار کرنے والے مصطفٰی قریشی نے دی لیجنڈ آف مولا جٹ کے بارے میں کہا کہ ’اس فلم میں بھی نوری حاوی تھا، اس میں بھی نوری حاوی ہے، ہماری فلم غریبانہ تھی، یہ فلم امیرانہ ہے، میری دعا ہے کہ یہ فلم 200 کروڑ کمائے۔