میسی فٹ بال ورلڈ کپ میں دو پینلٹیز مس کرنے والے دنیا کے دوسرے کھلاڑی

قطر کے دارالحکومت دوحہ کے سٹیڈیم 974 میں ایک اہم میچ میں بدھ کی رات کو ارجنٹائن نے پولینڈ کو دو گول سے شکست دے کر فٹ بال ورلڈ کپ کے راؤنڈ آف 16 کے لیے کوالیفائی کر لیا ہے۔

پولینڈ شکست کے باوجود راؤنڈ آف 16 کے لیے کوالیفائی کر گیا ہے۔ راؤنڈ آف 16 میں ارجنٹائن کا مقابلہ بدھ کو آسٹریلیا جبکہ پولینڈ ناک آؤٹ اسٹیج میں فرانس کا سامنا کرے گا۔

ارجنٹائن کی جیت کے بعد لیونل میسی سوشل میڈیا پر ٹرینڈ کر رہے ہیں اور اس کی وجہ ان کی ٹیم کی اگلے راؤنڈ تک رسائی ہونے کے ساتھ ساتھ ایک پینلٹی مس کرنا بھی ہے۔

پولینڈ کے خلاف میچ 39 ویں منٹ میں لیونل میسی کو پینلٹی دی گئی تھی لیکن پولش گول کیپر ان کے سامنے آہنی دیوار ثابت ہوئے۔ اپنے کیریئر میں اب تک ارجنٹائن کے سپر سٹار 31 پینیلٹیز مس کر چکے ہیں۔

پولینڈ کے خلاف پینلٹی ضائع کرنے کے بعد لیونل میسی دنیا کے وہ دوسرے فٹ بالر بن گئے ہیں جنہوں نے ورلڈ کپ میں دو پینلٹیز مس کی ہیں۔

اس سے قبل 2018 میں روس میں ہونے والے ورلڈ کپ میں لیونل میسی نے آئس لینڈ کے خلاف بھی پینلٹی مس کی تھی۔

اگر گذشتہ رات ارجنٹائن کی ٹیم اپنا میچ تین گول سے جیت جاتی تو پولینڈ کی ٹیم ورلڈ کپ سے باہر اور میکسیکو کی ٹیم راؤنڈ آف 16 میں پہنچ جاتی۔

لوگوں نے سوشل میڈیا پر اس بات پر بھی خوب طنز و مزاح کے پھول بکھیرے۔ فٹ بال فین سارہ نے ایک ٹویٹ میں لکھا ’لیونل میسی نے جان بوجھ کر اس لیے پینلٹی مس کی تاکہ لیوانڈوسکی کوالیفائی کر جائیں اور میکسیکو باہر ہوجائے۔‘

خیال رہے رابرٹ لیوانڈوسکی پولینڈ کے کپتان ہیں اور اس کے ساتھ ساتھ وہ ہسپانوی فٹ بال کلب بارسلونا میں بھی کھیلتے ہیں۔

بال سٹریٹ نامی فٹ بال فین میڈیا ایجنسی نے لیونل میسی کے پینلٹی مس کرنے میں بھی ارجنٹائن ٹیم کے لیے ایک مثبت پہلو تلاش کرلیا۔

ایک ٹویٹ میں انہوں نے لکھا کہ 1978 کے ورلڈ کپ میں ماریو کیمپس نے تیسرے میچ میں پینلٹی مس کی تھی اور پھر ارجنٹائن وہ ورلڈ کپ جیت گیا تھا۔ ان کے مطابق 1986 کے ورلڈ کپ کے تیسرے میچ میں ڈیاگو میراڈونا نے پینلٹی مس کی تھی اور وہ ورلڈ کپ بھی ارجنٹائن جیتا تھا۔

بال سٹریٹ نے لکھا کہ پولینڈ کے خلاف بدھ کی رات کھیلا جانے والا میچ ارجنٹائن کا اس ورلڈ کپ میں تیسرا میچ تھا اور وہاں پینٹلی مس ہوگئی۔

کیا اس بار بھی لیونل میسی کا پینلٹی مس کرنا ارجنٹائن کے لیے ایک اور ورلڈ کپ جیتنے کی نشانی ہے؟