پاکستان کے الیکشن کمیشن نے تحریک انصاف کے چیئرمین عمران خان سمیت دیگر رہنماؤں اسد عمر اور فواد چوہدری کے قابل ضمانت وارنٹ گرفتاری جاری کیے ہیں۔
منگل کو چار رُکنی الیکشن کمیشن نے اِن رہنماؤں کے قابل ضمانت وارنٹ گرفتاری کمیشن اور چیف الیکشن کمشنر کی توہین کے مقدمے میں جاری کیے۔
مزید پڑھیں
-
وزیر آباد میں عمران خان پر حملہ: معاملے کو کون اُلجھا رہا ہے؟Node ID: 732246
الیکشن کمیشن کے فیصلے کو تحریک انصاف کے رہنما فواد چوہدری نے عدالتی فیصلے کی توہین قرار دیتے ہوئے کہا ہے کہ یہ جانبدارانہ ہے اور اس کے خلاف ہائیکورٹ میں جائیں گے۔
انہوں نے اپنی ٹویٹ میں کہا کہ کیس کی تاریخ 17 جنوری رکھی ہے جو رولز کے خلاف مقرر کر کے فیصلہ دیا گیا ہے۔
الیکشن کمیشن نے تحریک انصاف کے رہنماؤں کے بیانات کا نوٹس لیتے ہوئے اُن کو جواب دینے کے لیے طلب کیا تھا۔
عمران خان، اسد عمر اور فواد چوہدری نے پیش ہونے کے بجائے استثنیٰ کی درخواستیں دائر کی تھیں جن کو الیکشن کمیشن نے مسترد کر دیا۔
الیکشن کمیشن نے تینوں رہنماؤں کے قابل ضمانت وارنٹ جاری کرتے ہوئے 17 جنوری تک پیش ہونے کی ہدایت کی ہے۔
الیکشن کمیشن کا قابل ضمانت وارنٹ جاری کرنے کا فیصلہ ہائیکورٹ کے فیصلے کی توہین ہے، کیس کی تاریخ 17 جنوری گھی جس کو رولز کے خلاف آج مقرر کرکے فیصلہ دیا گیا یہ الیکشن کمیشن کے ان بونے ممبران کا ایک اور جانبدار فیصلہ ہے، اس فیصلے کے خلاف ہائیکورٹ میں توھین عدالت کا مقدمہ کریں گے
— Ch Fawad Hussain (@fawadchaudhry) January 10, 2023
الیکشن کمیشن نے درخواستوں پر تین جنوری کو فیصلہ محفوظ کیا تھا۔
فیصلے کے مطابق عمران خان، اسد عمر اور فواد چوہدری کو 50 ہزار روپے کے ضمانتی مچلکے جمع کرانا ہوں گے۔
خیال رہے کہ تحریک انصاف کے رہنماؤں نے الیکشن کمیشن کے توہین کے نوٹسز کو سپریم کورٹ میں چیلنج کیا تھا جس پر سپریم کورٹ نے الیکشن کمیشن کو عمران خان، فواد چوہدری اور اسد عمر کے خلاف کارروائی جاری رکھنے کی اجازت دی تھی۔
سپریم کورٹ نے کہا تھا کہ الیکشن کمیشن پی ٹی آئی رہنماؤں کو جاری شوکاز نوٹسز پر اعتراضات کا بھی جائزہ لے۔
![](/sites/default/files/pictures/January/36476/2023/imran_khan_in_ihc.jpeg)