آسمانی بجلی سے اونٹوں کی ہلاکت، خانہ کعبہ کا ٹھنڈا فرش اور ویزے کے اجرا سمیت گزشتہ ہفتے سعودی عرب کی اہم خبریں
آسمانی بجلی سے اونٹوں کی ہلاکت، خانہ کعبہ کا ٹھنڈا فرش اور ویزے کے اجرا سمیت گزشتہ ہفتے سعودی عرب کی اہم خبریں
اتوار 16 اپریل 2023 0:06
سوشل ڈیسک -اردو نیوز
گذشتہ ہفتے سعودی عرب میں بارش کی پیش گوئی، خانہ کعبہ کے ٹھنڈے فرش، آسمانی بجلی گرنے سے اونٹوں کی ہلاکت، وزٹ ویزے کے اجرا اور باحہ میں برفباری سے متعلق خبریں قارئین کی توجہ کا مرکز رہیں۔
آخری عشرے میں کون سے علاقے بارش کی زد میں؟
سعودی عرب میں موسمیات کے قومی مرکز نے کہا ہے کہ’ رمضان کے آخری عشرے میں مملکت بھر میں بارش کا امکان ہے‘۔
الاخباریہ چینل کے معروف پروگرام ’نشرۃ النھار‘ (دن کا خبرنامہ) سے گفتگو کرتے ہوئے قومی مرکز کے ترجمان حسین القحطانی کا کہنا تھا کہ ’آخری عشرے میں کوہستانی علاقے بارش سے زیادہ متاثر ہوں گے۔‘
خانہ کعبہ کا فرش تاسوس کے سنگِ مر مر سے تیار کیا گیا ہے۔ (فوٹو: حرمین شریفین/ٹوئٹر)
شدید گرمی کے باوجود خانہ کعبہ کا فرش کیوں ٹھنڈا رہتا ہے؟
مسجد الحرام مکہ مکرمہ میں شدید گرمی کے باوجود خانہ کعبہ کا فرش ٹھنڈا رہتا ہے۔ بیشتر زائرین اس کا سبب جاننا چاہتے ہیں۔
العربیہ نیٹ کے مطابق بعض زائرین کا خیال ہے کہ زیرِ زمین ایئرکنڈیشن سسٹم نصب ہے جس سے مسجد الحرام کا فرش پچاس سینٹی گریڈ درجہ حرارت کے باوجود ٹھنڈا رہتا ہے۔ یہ بات درست نہیں ہے۔
ویزے کی مدت کا حساب مملکت آمد کے دن سے کیا جاتا ہے۔ (فوٹو: جوازات/ٹوئٹر)
سعودی عرب میں ورک وزٹ ویزے پر کب تک قیام کر سکتے ہیں؟
سعودی عرب میں وزٹ ویزے دوطرح کے جاری کیے جاتے ہیں۔ سنگل انٹری ویزے کی انتہائی مدت 6 ماہ جبکہ ملٹی انٹری ویزے ایک برس کے لیے کارآمد ہوتے ہیں۔
امیگریشن قوانین کے مطابق یہ لازمی ہے کہ وزٹ ویزے پرآنے والے وقت مقررہ پر مملکت سے نکل جائیں بصورت دیگر ان کے خلاف ویزا ایکسپائری کی خلاف ورزی درج کی جاتی ہے۔
جوازات کے ٹوئٹر پر ایک خاتون نے دریافت کیا ’اسٹوڈنٹ ویزے پر مملکت میں مقیم ہوں۔ خروج نہائی پرجارہی ہوں، معلوم یہ کرنا ہے کہ کیا مجھے یہاں سے اپنے ملک ہی جانا ہوگا یا کہیں اور یعنی کسی دوسرے ملک بھی جاسکتی ہوں؟‘
