عید الاضحٰی کے تینوں دن پاکستان میں موسم کیسا رہے گا؟

پاکستان کے محکمہ موسمیات نے کہا ہے کہ عید الاضحٰی کے پہلے روز یعنی جمعرات کو ملک کے بیشتر علاقوں میں موسم گرم اور مرطوب رہے گا۔

محکمہ موسمیات کی بدھ کو جاری ہونے والی رپورٹ کے مطابق جمعرات کو جہاں ملک کے بیشتر علاقوں میں موسم گرم رہے گا وہیں پنجاب، اسلام آباد، خیبر پختونخوا، بالائی اور زیریں سندھ، شمال مشرقی بلوچستان، گلگت بلتستان اور پاکستان کے زیرانتظام کشمیر میں چند مقامات پر تیز ہواؤں/ آندھی اور گرج چمک کے ساتھ بارش کا امکان ہے۔ اس دوران بالائی خیبر پختونخوا میں چند مقامات پر موسلادھار بارش کا بھی امکان ہے۔

عید کے دورے روز یعنی جمعے کو خیبر پختونخوا، پنجاب، گلگت بلتستان، اپر سندھ اور پاکستان کے زیرانتظام کشمیر میں تیز ہواؤں/ آندھی اور گرج چمک کے ساتھ بارش کا امکان ہے۔

محکمہ موسمیات کے مطابق عید کے تیسرے روز بھی خیبر پختونخوا، پنجاب، گلگت بلتستان، اپر سندھ اور پاکستان کے زیرانتظام کشمیر میں تیز ہواؤں/ آندھی اور گرج چمک کے ساتھ بارش کا امکان ہے۔

آج موسم کیسا رہے گا؟

بدھ کو اسلام آباد، پنجاب، خیبر پختونخوا، بالائی اور جنوب مشرقی سندھ، شمال مشرقی اور جنوبی بلوچستان، گلگت بلتستان اور پاکستان کے زیرانتطام کشمیر میں کہیں کہیں پر تیز ہواؤں/ آندھی اور گرج چمک کے ساتھ بارش کا امکان ہے۔ اس دوران بالائی خیبر پختونخوا میں چند مقامات پر موسلادھار بارش کا بھی امکان ہے۔

خیال رہے کہ وفاقی وزیر برائے موسمیاتی تبدیلی شیری رحمان نے اتوار کو کہا تھا کہ رواں ہفتے شدید بارشوں کی وجہ سے شہری علاقوں میں اربن فلڈنگ جبکہ پہاڑی علاقوں میں سیلاب اور لینڈ سلائیڈنگ کا خدشہ ہے۔

شیری رحمان نے ایک ٹویٹ میں کہا کہ آج سے 30 جون تک ملک بھر میں پری مون سون بارشوں کی پیش گوئی کی گئی ہے جس کی وجہ سے موجودہ شدید گرمی کی لہر میں کمی کا امکان ہے۔