ایشین گیمز کے لیے پاکستان ویمن کرکٹ ٹیم کا اعلان

پاکستان ویمن کرکٹ ٹیم کی بیٹر عائشہ نسیم نے کرکٹ سے علیحدگی کا فیصلہ کر لیا ہے۔ انہوں نے آئی سی سی ویمنز ٹی ٹوئنٹی ورلڈ کپ میں پاکستان کی نمائندگی کی تھی۔

منگل کو پاکستان کرکٹ بورڈ (پی سی بی) کی جانب سے جاری پریس ریلیز کے مطابق ’عائشہ نسیم نے ریٹائرمنٹ کا فیصلہ کر لیا ہے جسے پاکستان کرکٹ بورڈ نے منظور کرلیا ہے۔‘

اس کے علاؤہ ایشین گیمز کے لیے پاکستان ویمن کرکٹ ٹیم کا اعلان کر دیا گیا ہے جس میں سابق کپتان بسمہ معروف شامل نہیں ہیں۔ پی سی بی کے مطابق بسمہ معروف ایشین گیمز کی ٹیم میں شامل نہیں ہیں کیونکہ ایشین گیمز کے قواعد وضوابط کے تحت کھالڑیوں کو اپنے ساتھ بچے رکھنے کی اجازت نہیں ہوگی۔

ٹیم میں لیفٹ آرم اسپنر انوشے ناصر اور دائیں ہاتھ کی بیٹر شوال ذوالفقار کو پہلی بار پاکستان کی پندرہ رکنی سینئر ویمنز ٹیم میں شامل کرلیا گیا ہے جو اس سال ستمبر میں چین میں ہونے والے ایشین گیمز کے کرکٹ ایونٹ میں حصہ لیں گی۔  ان کی سلیکشن انڈر19 ویمنز ٹی ٹوئنٹی ورلڈ کپ اور ایمرجنگ ویمنز ایشیا کپ میں ان کی عمدہ کارکردگی کی وجہ سے عمل میں آئی ہے۔

ٹیم میں ڈیانا بیگ کی بھی واپسی ہوئی ہے جو اس سال آسٹریلیا کے خالف تیسرے ون ڈے انٹرنیشنل میں انگلی زخمی ہوجانے کے بعد سے انٹرنیشنل کرکٹ سے باہر تھیں۔

ایشین گیمز کے کرکٹ مقابلے اس سال 19سے 26 ستمبر تک چین کے شہر ہینگ زو میں منعقد ہوں گے۔

پاکستان کی ویمنز ٹیم 2010 ء میں چین میں ہونے والے ایشین گیمز اور پھر2014ء میں جنوبی کوریا میں ہونے والے ایشین گیمز کے کرکٹ مقابلوں میں گولڈ میڈل جیت چکی ہے اور اس کی نظریں اب ہیٹ ٹرک مکمل کرنے پر مرکوز ہیں۔

ایشین گیمز کے کرکٹ مقابلے ٹی ٹوئنٹی فارمیٹ کے تحت کھیلے جائیں گے۔ پاکستانی ویمنز کرکٹ ٹیم آئی سی سی کی عالمی رینکنگ اور ٹورنامنٹ کے قواعدوضوابط کے مطابق ٹورنامنٹ کا آغاز کوارٹرفائنل سے کرے گی جو 22سے 24ستمبر تک ہونگے۔سیمی فائنلز25 ستمبر کو کھیلے جائیں گے جبکہ فائنل 26 ستمبر کو ہوگا۔

پندرہ رکنی اسکواڈ کا انتخاب ویمنز سلیکشن کمیٹی کے چیرمین سلیم جعفر۔ ہیڈ کوچ مارک کولز اور کپتان ندا ڈار کی مشاورت سے کیا گیا ہے۔

پاکستانی سکواڈ ان کھالڑیوں پر مشتمل ہے۔ ندا ڈار  کپتان،  عالیہ ریاض انوشے ناصر، ڈیانا بیگ، فاطمہ ثنا، منیبہ علی، ناجیہہ علوی، نشرہ سندھو، نتالیہ پرویز، عمیمہ سہیل، صدف شمس، شوال ذوالفقار، سدرہ امین، عروب شاہ اور ام ہانی۔

ایشین گیمز سے قبل پاکستانی ویمنز کرکٹ ٹیم یکم سے 14 ستمبر تک جنوبی افریقہ کے خالف ہوم سیریز میں تین ٹی ٹوئنٹی انٹرنیشنل اور تین ون ڈے انٹرنیشنل  (آئی سی سی چیمپئن شپ کا حصہ) کھیلے گی۔ اس سیریز کے لیے پاکستانی ٹیم کا اعلان بعد میں کیا جائے گا۔