کویت کی طرف سے ایرانی وزیر خارجہ کے دورہ سعودی عرب کا خیر مقدم

کویتی وزیر خارجہ شیخ سالم عبداللہ الجابر الصباح نے ایرانی وزیر خارجہ حسین امیر عبداللھیان کے حالیہ دورہ سعودی عرب کو سراہا ہے۔

انہوں نے ایرانی  اور سعودی وزرائے خارجہ کے درمیان ملاقات کے نتائج کا خیر مقدم کیا۔ 

کویتی وزارت خارجہ سے جاری بیان کے مطابق کویتی وزیر خارجہ نے امید ظاہر کی کہ ’یہ دورہ خلیج ایران تعلقات کی تاریخ میں ایک نئے روشن باب کا آغاز ہوگا جو اچھی ہمسائیگی کے تعلقات،  دوسرے ممالک کے اندرونی معاملات میں عدم مداخلت، تعاون اور مکالمے کے اصولوں پر استوار ہے‘۔

انہوں نے کہا کہ’ سعودی، ایران تعلقات، خطے میں امن اور خوشحالی کے حصول میں اہم کردار ادا کریں گے اور مستقبل کے چیلنجوں سے نمٹنے کےلیے ممالک کو بااختیار بنانے کا عنصر ثابت ہوں گے۔

انہوں نے کہا کہ’ یہ دورہ دوطرفہ تعلقات کی بحالی، علاقائی سلامتی اور تحفظ کے لیے دونوں ملکوں کی خواہش کا اظہار کرتا ہے‘۔

انہوں نے تعلقات بہتر بنانے میں چین کی ثالثی اور بات چیت میں سہولت فراہم کرنے پر عراق اور عمان کی کوششوں کو بھی سراہا۔

اخبار 24 کے مطابق کویتی وزیر خارجہ نے کہا کہ’ ایرانی وزیر خارجہ کا دورہ سعودی عرب اس بات کا اشارہ ہے کہ دونوں ملک باہمی تعلقات کو معمول پر لانے اور خطے کے امن و استحکام کے تحفظ میں اپنا کردار ادا کرنا چاہتے ہیں‘۔

 ’اس سے دونوں ملکوں کے درمیان اعتماد کا رشتہ استوار ہوگا جس سے پورے خطے بلکہ دنیا بھر کو فائدہ ہوگا‘۔ 

کویتی وزیر خارجہ نے اس خواہش کا اظہار کیا کہ’ یہ دورہ دونوں ملکوں کے درمیان مستحکم تعلقات کے قیام کی جہت میں اہم قدم ثابت ہو۔ دوطرفہ  تعلقات کے تحت فریقین ایک دوسرے کا احترام کریں اور یہ دورہ ایرانی خلیجی تعلقات کی تاریخ میں روشن باب کا نقطہ آغاز بنے‘۔

یاد رہے کہ سعودی وزیر خارجہ کی جمعرات کو ایرانی وزیر خارجہ سے ملاقات ہوئی تھی۔ دونوں وزرا نے مشترکہ موضوعات اور متعدد امور پر مذاکرات کیے تھے۔