پی ٹی آئی کے صدر پرویز الٰہی رہائی کے آٹھ منٹ بعد دوبارہ گرفتار

پاکستان تحریک انصاف کے صدر پرویز الہی کو رہائی کے فوری بعد اسلام آباد پولیس نے  دوبارہ گرفتار کر لیا ہے۔

اسلام آباد پولیس نے منگل کو ٹوئٹر (ایکس)  ہینڈل پر لکھا کہ پرویز الہٰی کو تھانہ سی ٹی ڈی نے مقدمہ نمبر 3/23 میں گرفتار کر لیا۔

خیال رہے اسلام آباد پولیس نے چھ بج کر 22 منٹ پر ٹویٹ کیا کہ ’پرویز الہی کو عدالت کے حکم پر روانہ کر دیا گیا۔‘ لیکن ٹھیک آٹھ منٹ بعد 6 بج کر 30 منٹ پر اسی ہینڈل سے ٹویٹ کرکے اطلاع دی گئی کہ ’پرویز الہٰی کو تھانہ سی ٹی ڈی نے مقدمہ نمبر 3/23 میں گرفتار کر لیا۔‘

قبل ازیں اسلام آباد ہائی کورٹ نے  چوہدری پرویز الٰہی کی تھری ایم پی او کے تحت گرفتاری کا حکم معطل کرتے ہوئے انہیں فوری رہا کرنے کا حکم دیا تھا۔

منگل کو چوہدری پرویز الہی کے ایم پی او آرڈر کالعدم قرار دینے کی درخواست پر سماعت کرتے ہوئے جسٹس طارق محمود جہانگیری نے ان کی رہائی کے احکامات دیے۔

عدالت نے آئندہ سماعت تک پرویز الٰہی کو کسی قسم کا بیان دینے سے منع کیا تھا۔

عدالت نے فریقین کو نوٹس جاری کرتے ہوئے آئندہ سماعت تک جواب طلب کر لیا تھا۔

عدالت نے ریمارکس دیے کہ وکیل درخواست گزار کے مطابق پرویز الٰہی کے خلاف اسلام آباد میں کوئی بھی ایف آئی آر درج نہیں ہے۔