دنیا کے مضبوط اور کمزور ترین پاسپورٹ کون سے ممالک کے ہیں؟

دنیا بھر کے ممالک کے پاسپورٹس کی رینکنگ جاری کرنے والے ادارے ’ہینلے اینڈ پارٹنرز‘ پاسپورٹ انڈیکس کے مطابق پاکستانی پاسپورٹ کا شمار دنیا کے چار کمزور ترین پاسپورٹس میں ہوتا ہے۔

انڈیکس رینکنگ کے مطابق 106 ممالک میں پاکستانی پاسپورٹ 103 نمبر پر ہے۔ اس کے ساتھ جن کمزور پاسپورٹ والے ممالک کی فہرست جاری کی گئی ہے ان میں عراق 104، یمن 105 اور افغانستان 106 رینکنگ پر موجود ہے جبکہ انڈیا اس فہرست میں 81ویں نمبر پر ہے۔

دوسری جانب عرب دنیا میں متحدہ عرب امارات کا پاسپورٹ 8 ویں نمبر پر ہے۔ امارات کے پاسپورٹ پر 227 میں سے 187 ممالک کا ویزے کے بغیر سفر کیا جا سکتا ہے۔

دیگر عرب ممالک میں قطر 53ویں، کویت 55ویں، سعودی عرب اور بحرین 60ویں، اور عمان 61ویں نمبر پر ہے۔

دنیا کے 10 مضبوط ترین پاسپورٹس کا ذکر کیا جائے تو ان 10 رینکس میں پہلے نمبر پر فرانس، جرمنی، اٹلی، جاپان، سنگاپور، سپین شامل ہیں۔ اس فہرست میں شامل ممالک 194 ممالک میں ویزا فری سفر کر سکتے ہیں۔

دوسرے نمبر پر آسٹریا، فن لینڈ، آئرلینڈ، لکسمبرگ، نیدرلینڈز، جنوبی کوریا اور سویڈن ہیں۔ ان ممالک کا پاسپورٹ رکھنے والے 193 ممالک کا ویزا فری سفر کر سکتے ہیں۔

تیسرے نمبر پر بیلجیم، ڈینمارک اور برطانیہ ہیں جہاں کے لوگ 192 ممالک کا ویزا فری سفر کر سکتے ہیں۔

چوتھے نمبر پر ناروے، پرتگال اور سؤٹزرلینڈ ہیں جن کے پاسپورٹس پر 191 ممالک کا ویزا فری سفر کیا جاسکتا ہے۔ پانچوں نمبر پر آسٹریلیا، گریس، مالٹا اور نیوزی لینڈ ہیں جن کے پاسپورٹس پر 190 ممالک میں بغیر ویزا سفر کیا جا سکتا ہے۔

دنیا کے چھٹے نمبر پر سب سے طاقتور پاسپورٹس کینیڈا، زیکیا، ہنگری، پولینڈ اور امریکہ کے ہیں۔ ساتویں نمبر پو لیتھیونیا، آٹھویں پر ایستونیا اور متحدہ عرب امارات، 9ویں پر لیٹویا، سلویکیا اور سلوینیا جبکہ 10ویں نمبر پرآئس لینڈ ہے۔

دوسری جانب دنیا کے 10 کمزور ترین پاسپورٹس کی رینکنگ میں 97ویں نمبر پر اریٹریا، 98ویں نمبر پر بنگلہ دیش اور شمالی کوریا، 99ویں نمبر پر فلسطین، 100ویں پر لیبیا اور نیپال، 101 نمبر پر صومالیہ، 102ویں پر یمن، 103 پر پاکستان، 104 پر عراق، 105 پر شام 106 اور آخری نمبر پر افغانستان ہے۔

دنیا بھر کے پاسپورٹس کو کیسے رینک کیا جاتا ہے؟

بین الاقوامی فرم ہینلے اینڈ پارٹنرز دنیا بھر کے پاسپورٹس کو رینک  کرتی ہے۔ انٹرنیشنل ایئر ٹرانسپورٹ ایسوسی ایشن (IATA) اس سے متعلق ڈیٹا فراہم کرتی ہے۔

ویب سائٹ ہینلے اینڈ پارٹنرز کے مطابق دی ہینلے اوپن نیس انڈیکس (ایچ او آئی) کے پاس دنیا بھر کے 199 ممالک کے پاسپورٹس کی رینکنگ جاری کرنے کا اختیار ہے۔ ہینلے اور پارٹنرز کی جانب سے پاسپورٹ کو دو طریقوں سے رینک کیا جاتا ہے۔

فری ویزا ایکسس

اگر کسی ایک ملک کا پاسپورٹ ہولڈر، دوسرے ملک میں بغیر ویزا لیے داخل ہو سکتا ہے تو اِس صورت میں ویزا دینے والے ملک کو ایک کا سکور دیا جاتا ہے۔

اس صورت حال میں ویزا آن ارائیول یعنی دوسرے ملک پہنچ کر ویزا حاصل کرنا، پرمٹ حاصل کرنا اور الیکٹرونک ٹریول اتھارٹی یعنی (ای ٹی اے) کا ویزا شامل ہے جس میں روانگی سے قبل حکومت سے ویزا لینا ضروری نہیں ہوتا۔

ایسے ویزے دوسرے ملک کے ویزا ویور پروگرام کے ماتحت ہوتے ہیں۔

ویزا ریکوائرمنٹ

اگر دوسرے ملک جانے سے پہلے کسی ملک کے پاسپورٹ ہولڈر کو اُس ملک کی حکومت سے منظور شدہ الیکٹرونک ویزا (ای ویزا) درکار ہو تو اس صورت میں ویزا دینے والے ملک کو صفر سکور دیا جاتا ہے۔

اگر کسی پاسپورٹ ہولڈر کو ویزا آن ارآئیول سے قبل اُس ملک کی حکومت سے منظوری لینا پڑے تو اس صورت میں بھی ویزا دینے والے ملک کو صفر سکور دیا جائے گا کیونکہ اس سسٹم کو ویزا فری تصور نہیں کیا جائے گا۔

اسی طرح ہر ملک کا مجموعی اوپن نیس سکور دوسرے ملک سے اُسے فری ویزا ملنے کے بعد طے کیا جاتا ہے۔