’بچوں کو دیکھ کر پڑھائی کا شوق‘ 63 سالہ سعودی خاتون نے گریجویشن کر لی
تعلیم کے سلسلے کو دوبارہ بحال کیا جو 40 برس قبل منقطع ہو گیا تھا ( فوٹو: العربیہ)
سعودی خاتون ھدی العبیدا نے بالاخر 40 برس بعد 63 سال کی عمر میں گریجویشن کی ڈگری حاصل کر لی۔
خاتون شادی کے بعد پڑھائی سے کنارہ کشی اختیار کر کے امورخانہ داری میں مصروف ہو گئی تھیں۔
الاخباریہ ٹی وی سے گفتگو کرتے ہوئے’ھدی العبیدا‘ نے بتایا’ گریجویشن آنرز کرنے کا شوق اپنے بچوں کو دیکھ کر آیا جب بچے یونیورسٹی جاتے اور راتوں کو پڑھا کرتے تو مجھے بھی یہ شوق ہوا کہ کیوں نہ میں بھی اس سلسلے کو دوبارہ بحال کروں جو 40 برس قبل منقطع ہو گیا تھا‘۔
ان کا کہنا تھا ’ابتدا میں کافی دشواری کا سامنا کرنا پڑا کیونلہ انگریزی کی تیاری مشکل تھی تاہم محنت اور شوق سے اس مشکل پرقابو پالیا‘۔
’فاونڈیشن ایئر کامیابی سے مکمل کیا اورسائیکلوجی میں گریجویشن کی کیونکہ یہ مضمون میرا پسندیدہ تھا۔ اسی لیے اس کا انتخاب کیا‘۔
ھدی العبیدا نے بتایا ’میری اس کامیابی میں میرے شوہر کا بہت حصہ ہے۔ انہوں نے ہمیشہ میری پذیرائی اور مجھے ہمت دیتے رہے جب بھی میں کمزور پڑتی وہ مجھے سہارا دیتے تاہم میں نے بھی اپنے شوہر کی ہمیشہ قدر کی‘۔
’اگر کبھی انہیں کسی قسم کی دشواری ہوتی تو انہیں دلاسہ دیتی اور ہرممکن مدد وتعاون کرتی تھی‘۔
سعودی خاتون نے مزید کہا ’بعض اوقات باہر کی پریشانی سے تنگ آکر شوہر کا رویہ اچھا نہ ہوتا تو اسے کبھی محسوس نہیں کیا ۔میرے رویے کو دیکھ کر وہ بھی میرے قدردان ہو گئے اس طرح میری کامیابی کی منزل بھی مجھے مل گئی‘۔
