سابق پاکستانی کرکٹر دانش کنیریا کی تصویر انڈین سٹیڈیم سے کیوں ہٹائی گئی؟

انڈین کرکٹ ویب سائٹ ون کرکٹ کے مطابق جے پور کے سوائی مان سنگھ سٹیڈیم سے سابق پاکستانی لیگ سپنر دانش کنیریا کی تصویر ہٹا دی گئی ہے۔

سابق پاکستانی کرکٹر دانش کنیریا کی تصویر ایسے وقت میں ہٹائی گئی ہے جب حالیہ پہلگام حملے کے بعد پاکستان اور انڈیا کے تعلقات میں کشیدگی بڑھ چکی ہے۔

جہاں انڈیا میں پاکستانی شوبز شخصیات اور سوشل میڈیا اکاؤنٹس پر پابندیاں دیکھنے میں آئیں وہیں سابق پاکستانی کرکٹر کی تصویر کا ہٹائے جانا انڈیا اور پاکستان کے درمیان بگڑتے ہوئے سفارتی تعلقات کی عکاسی کرتا ہے۔ 

واضح رہے دانش کنیریا پہلگام حملے کے بعد پاکستان کے وزیراعظم شہباز شریف پر سوال اٹھاتے نظر آئے تھے جس کے بعد انہیں پاکستانی کرکٹ صارفین کی طرف سے تنقید اور مخالفت کا سامنا کرنا پڑا تھا۔ 

سماجی رابطے کی ویب سائٹ ایکس پر ایک انڈین اکاؤنٹ سے کی گئی پوسٹ میں لکھا گیا ہے کہ ’راجستھان کرکٹ ایسوسی ایشن سے سوال کیا گیا کہ ابھی تک پاکستانی کرکٹر کی تصاویر کیوں انڈین سٹیڈیمز میں موجود ہیں جس پر حکام نے کہا کہ اب ہم تصاویر ہٹا رہے ہیں۔

دانش کنیریا کی تصویر اس لیے بھی سوشل میڈیا پر زیر بحث ہے کہ انہوں نے کبھی بین الاقوامی سطح پر اس سٹیڈیم میں کوئی میچ نہیں کھیلا تھا۔ سٹیڈیم انتظامیہ کے مطابق، یہ تصویر اُن نامور کھلاڑیوں کے اعزاز میں لگائی گئی تھی جنہوں نے انڈیا کے خلاف نمایاں کارکردگی دکھائی۔

تاہم حالیہ کشیدگی اور کنیریا کے متنازع سیاسی بیانات کے پیشِ نظر حکام نے ممکنہ تنازع سے بچنے کے لیے تصویر ہٹانے کا فیصلہ کیا۔

انیل دلپت کے بعد دانش کنیریا پاکستان کی جانب سے کھیلنے والے دوسرے ہندو کرکٹر تھے۔

انہوں نے 2000 سے 2012 کے درمیان 61 ٹیسٹ اور 18 ون ڈے میچز کھیلے۔ اپنی لیگ سپن بولنگ کی بدولت وہ 261 ٹیسٹ وکٹیں لینے میں کامیاب ہوئے جو پاکستان کی تاریخ میں چوتھا بلند ترین اعزاز ہے جس میں 15 مرتبہ پانچ وکٹیں حاصل کرنے کا اعزاز بھی شامل ہیں۔ 

انڈیا کے خلاف ان کا ریکارڈ خاص طور پر متاثر کن رہا۔ انہوں نے 11 ٹیسٹ اور 2 ون ڈے میچز میں 44 وکٹیں حاصل کیں۔

تاہم، دانش کنیریا کا کیریئر 2012 میں اس وقت زوال کا شکار ہوا جب انگلینڈ اینڈ ویلز کرکٹ بورڈ (ECB) نے اُن پر ایسیکس کاؤنٹی کے لیے کھیلتے ہوئے سپاٹ فکسنگ میں ملوث ہونے پر تاحیات پابندی عائد کی۔ 

اس تنازع نے ان کی کرکٹ میں حاصل کردہ کامیابیوں کو پس منظر میں دھکیل دیا اور ان کا بین الاقوامی کرکٹ کا سفر ختم ہو گیا۔