اب تک 6 لاکھ 65 ہزار عازمین حج ارض مقدس پہنچ گئے

وزارت حج و عمرہ نے کہا ہے کہ کل منگل 22 ذو القعدہ تک بیرون ملک سے آنے والے عازمین حج کی تعداد 6 لاکھ 65 ہزار سے زائد ہوچکی ہے۔

سبق ویب سائٹ کے مطابق وزارت نے کہا ہے کہ ’اب تک جاری کئے جانے والے حج ویزوں میں سے 46 فیصد افراد سعودی عرب پہنچے ہیں‘۔

وزارت نے کہا ہے کہ ’عازمین حج تین اہم راستوں کے ذریعے مملکت میں داخل ہوئے۔ سب سے زیادہ عازمین ہوائی راستے سے آئے ہیں جن کی تعداد 6 لاکھ 42 ہزار سے تجاوز کر گئی‘۔

’ اس کے بعد زمینی راستوں سے تقریباً 20 ہزار حجاج آئے جبکہ سمندری راستوں کے ذریعے آنے والے حجاج کی تعداد 2821 رہی‘۔

وزارت نے کہا ہے کہ ’ یہ سب  ایک مربوط نظام کے تحت انجام دیا گیاہے جس کی نگرانی حکومتی، سیکیورٹی اور خدمات فراہم کرنے والے اداروں کے ماہرین کر رہے ہیں‘۔