ایکس کی سروس میں تعطل، ملکی سطح پر کوئی رکاوٹ نہیں ڈالی گئی: پی ٹی اے

پاکستان ٹیلی کمیونیکیشن اتھارٹی (پی ٹی اے) نے کہا ہے سماجی رابطوں کی ویب سائٹ ایکس (سابق ٹوئٹر) کی سروس میں تعطل بین الاقوامی نوعیت کا ہے اور اس میں ملکی سطح پر کوئی رکاوٹ نہیں ڈالی گئی۔

پی ٹی اے نے سنیچر کو ایک بیان میں کہا کہ سوشل میڈیا پلیٹ فارم ایکس (سابقہ ٹوئٹر) اس وقت دنیا کے متعدد ممالک بشمول پاکستان میں بڑے پیمانے پر سروس تعطل کا شکار ہے۔

’یہ تعطل اُس عالمی مسئلے کے بعد پیش آیا ہے جس کا سامنا پلیٹ فارم کو جمعرات، 22 مئی کو بھی کرنا پڑا تھا، جو کئی گھنٹوں تک جاری رہا اور بعد ازاں پلیٹ فارم نے خود بحال کیا۔‘

بیان کے مطابق ’پی ٹی اے کو دوران تحقیقات یہ بات سامنے آئی ہے کہ پاکستان کے انٹرنیٹ گیٹ ویز کو کسی تکنیکی مسئلے کا سامنا نہیں ہے اور ملک بھر میں دیگر تمام انٹرنیٹ سروسز معمول کے مطابق کام کر رہی ہیں۔‘

’انٹرنیٹ کی نگرانی کرنے والے عالمی ادارے ’نیٹ بلاکس‘ نے بھی اس بات کی تصدیق کی ہے کہ ایکس کو درپیش یہ تعطل بین الاقوامی نوعیت کا ہے اور اس کا کسی ملک کی سطح پر انٹرنیٹ سروس میں رکاوٹ یا فلٹرنگ سے کوئی تعلق نہیں ہے۔

پی ٹی اے اس صورتحال کی مسلسل نگرانی کر رہی ہے اور عوام کو کسی بھی اہم پیش رفت سے بروقت آگاہ کیا جائے گا۔

سنیچر کو دنیا بھر میں لاکھوں صارفین کو ایکس کی سروس میں تعطل کا سامنا کرنا پڑا۔ صارفین کی جہاں ایکس کے ویب پیج تک رسائی نہیں ہو پا رہی تھی وہیں اس کی ایپ بھی ٹھیک سے کام نہیں کر رہی تھی۔