نیرو باجوہ کے انسٹا گرام سے فلم ’سردار جی 3‘ کی پوسٹس کیوں ڈیلیٹ کر دیں

پنجابی گلوکار و اداکار دلجیت دوسانجھ، نیرو باجوہ اور پاکستانی اداکارہ ہانیہ عامر کی فلم ’سردار جی تھری‘ آج پاکستان سمیت دنیا بھر میں ریلیز ہونے جا رہی ہے۔

یہ فلم پہلے ہی پاکستان اور انڈیا کے تعلقات کے باعث تنازع کا شکار ہے اور انڈیا میں اس کو ریلیز نہ کیے جانے کی وجہ فلم میں پاکستانی اداکارہ ہانیہ عامر کی کاسٹنگ ہے۔

ٹائمز آف انڈیا کے مطابق فلم کی ریلیز سے ایک روز قبل مداحوں نے دیکھا کہ فلم کی اداکارہ نیرو باجوہ نے انسٹاگرام سے ’سردار جی 3‘ سے متعلق تمام پوسٹس ڈیلیٹ کر دی ہیں۔

نییرو باجوہ کے اس اقدام کے بعد انٹرنیٹ پر چہ مگوئیاں شروع ہوئیں کہ اداکارہ خاموشی سے خود کو اس فلم سے دور کر رہی ہیں؟

یہ سلسلہ اس وقت شروع ہوا جب سوشل میڈیا پلیٹ فارم ریڈٹ پر صارف نے انسٹاگرام پیج ’لالی ووڈ سپیس‘ کی ایک پوسٹ شیئر کی جس میں دعویٰ کیا گیا تھا کہ نیرو باجوہ نے نہ صرف فلم سے متعلق تمام پوسٹس ہٹائیں بلکہ مبینہ طور پر ہانیہ عامر اور دلجیت دوسانجھ کو انسٹاگرام پر ان فالو بھی کر دیا ہے۔

انڈین میڈیا کی جانب سے اس دعوے کی آزادانہ طور پر تصدیق نہیں کی۔ البتہ دلجیت دوسانجھ اب بھی نیرو باجوہ کی فالوونگ لسٹ میں موجود ہیں، یعنی اداکارہ نے ان کو ان فالو نہیں کیا۔

دوسری جانب ہانیہ عامر نیرو باجوہ کی فالوونگ لسٹ میں موجود نہیں ہیں اور اس بات کی تصدیق کرنا بھی مشکل ہے کہ آیا وہ ہانیہ عامر کو فالو کر بھی رہیں تھی یا نہیں۔

نیرو کی تازہ ترین انسٹاگرام پوسٹ اب ان کی اگلی فلم 'سن آف سردار 2' کا ٹیزر ہے، جبکہ ان کی انسٹاگرام پروفائل پر 'سردار جی 3' کا کوئی ذکر موجود نہیں۔

دلجیت دوسانجھ اور نیرو باجوہ کا موقف

نیرو باجوہ نے تاحال اس تنازع پر کوئی گفتگو نہیں کی مگر دلجیت دوسانجھ یہ موقف اپنا چکے ہیں کہ اس فلم کی شوٹنگ انڈیا اور پاکستان تنازع سے پہلے ہوئی تھی۔

حال ہی میں سوشل میڈیا پر وائرل ایک انٹرویو میں دلجیت دوسانجھ یہ بھی کہہ چکے ہیں کہ فلم کے انڈیا میں ریلز نہ ہونے سے نقصان ہوگا۔

فلم کے خلاف اٹھنے والی آوازیں

اس سے قبل انڈیا کی فلمی تنظیم ’فیڈریشن آف ویسٹرن انڈیا سینی ایمپلائز (ایف ڈبلیو آئی سی ای) نے نہ صرف ناراضی ظاہر کی تھی بلکہ انڈین حکومت سے دلجیت دوسانجھ کے خلاف سخت کارروائی کا مطالبہ بھی کیا تھا۔

ایف ڈبلیو آئی سی ای نے اسے ’ملک دشمن اقدام‘ قرار دیتے ہوئے انڈین حکومت اور وزیرِاعظم نریندر مودی سے مطالبہ کیا تھا کہ دلجیت دوسانجھ، فلم کے پروڈیوسرز گنبیر سنگھ سدھو، منموڈ سدھو، اور ہدایت کار امر ہنڈال کے پاسپورٹس منسوخ کیے جائیں اور ان کی انڈین شہریت کے اختیارات ختم کیے جائیں۔

اس کے علاوہ آل انڈین سینی ورکرز ایسوسی ایشن (اے آئی سی ڈبلیو اے) نے بھی دلجیت دوسانجھ کے خلاف سخت مؤقف اختیار کرتے ہوئے انڈیا کے وزیراعظم نریندر مودی کو ایک باقاعدہ خط ارسال کیا ہے۔

اے آئی سی ڈبلیو اے نے سوشل میڈیا پلیٹ فارم ایکس پر اپنا خط پوسٹ کیا، جس میں دلجیت پر غیر حساس رویہ اختیار کرنے کا الزام لگایا گیا ہے۔

ایسوسی ایشن کے مطابق ’ہانیہ عامر نے ’آپریشن سندور‘ کے بعد انڈین مخالف بیانات دیے تھے اور ایسے اداکار کے ساتھ تعاون ناقابل قبول ہے۔‘

اے آئی سی ڈبلیو اے نے دلجیت دوسانجھ کے سوشل میڈیا اکاؤنٹس کو انڈیا میں فوری طور پر معطل کرنے اور ان کے تمام گانے، فلمیں اور دیگر مواد یوٹیوب، سپاٹیفائی، جیو ساون اور دیگر او ٹی ٹی پلیٹ فارمز سے ہٹانے کا مطالبہ کیا ہے۔

سردار جی تھری آج پاکستان میں بھی ریلیز ہوگی

امرت ہندال کی ہدایتکاری میں بننے والی 'سردار جی 3' ایک ہارر کامیڈی فلم ہے جس میں دلجیت دوسانجھ اور ہانیہ عامر بھوت پکڑنے والے کرداروں میں دکھائی دیں گے، جو برطانیہ کے ایک پرسرار محل میں پیش آنے والے عجیب و غریب واقعات کا سامنا کرتے ہیں۔ نیرو باجوہ بھی فلم میں اہم کردار ادا کر رہی ہیں۔

موجودہ تنازع کی وجہ سے یہ فلم انڈیا میں ریلیز نہیں ہو رہی بلکہ  بیرونِ ملک سینما گھروں میں دکھائی جائے گی جن میں پاکستان بھی شامل ہے۔