صدر زرداری کو ہٹائے جانے کی افواہوں پر کان نہ دھریں: محسن نقوی

وفاقی وزیرِ داخلہ محسن نقوی نے سنیچر کو صدر مملکت آصف علی زرداری کو عہدے سے ہٹانے کی خبروں کی تردید کرتے ہوئے کہا ہے کہ افواہیں پھیلائی جا رہی ہیں، ان پر کان نہ دھریں۔

روہڑی میں میڈیا سے گفتگو کے دوران جب وزیر داخلہ سے صدر مملکت آصف علی زرداری کو عہدے سے ہٹانے سے متعلق سوال کیا گیا تو انہوں نے جواب دیا کہ ’کچھ لوگوں کو اس بات پر تکلیف ہے کہ پہلی بار ہم سب اکھٹے ہیں، حکومت، سیاست دان اور ملٹری اسٹیبلشمنٹ ایک پیج پر ہیں، سوشل میڈیا کی افواہوں پر دھیان نہ دیں۔‘

صحافی نے محسن نقوی سے سوال کیا کہ کیا صدر مملکت آصف علی زرداری کو اُن کے عہدے سے ہٹایا جا رہا ہے ؟ جس پر محسن نقوی نے جواب دیتے ہوئے کہا کہ دو دن مزید سیاست نہ کریں اور سوشل میڈیا کی افواہوں پر دھیان نہ دیں۔

ان کا مزید کہنا تھا کہ ’سوشل میڈیا کی خبروں میں بالکل نہ جائیں، میرے خیال میں لوگوں کو تکلیف ہے کہ یہ سارے اکٹھے ہیں، تو اس لیے افواہیں پھیلائی جارہی ہیں۔‘

’پہلی دفعہ سیاست دان، حکومت اور ملٹری اسٹیبلشمنٹ ساری اکٹھی ہے تو لوگوں کو تکلیف ہوتی ہے تو لوگ اس طرح کی باتیں کرتے ہیں، لیکن میری درخواست ہے کہ دو دن سیاسی باتوں سے پرہیز کیا جائے۔‘

انہوں نے مزید کہا کہ جس طرح خیبرپختونخوا میں دہشت گردوں کو مار بھگایا ہے اسی طرح کچے کے ڈاکوؤں کے خلاف بھی وفاق اور صوبے مل کر بھرپور کارروائی کریں گے۔

محسن نقوی نے مزید کہا کہ مذہبی منافرت اور فرقہ وارانہ بیانات پر زیرو ٹالرنس پالیسی اپنائی گئی ہے، سوشل میڈیا پر مذہبی اشتعال انگیزی برداشت نہیں کی جائے گی، ملک میں امن و امان برقرار رکھنا ہماری اولین ترجیح اور فتنہ الہندوستان کے مذموم عزائم کو ناکام بنانے کے لیے فورسز چوکنا ہیں۔