امارات میں 2025 کے آخر تک سیاحتی شعبے میں 26 ہزار سے زیادہ نئی ملازمتیں

 متحدہ عرب امارات میں 2025 کے دوران ٹریول اینڈ ٹورازم  سیکٹر میں 26 ہزار 400 نئی ملازمتیں شامل ہوں گی۔ اس سال کے آخر تک اس شعبے میں کام کرنے والوں کی مجموعی تعداد 9 لاکھ 25 ہزار تک پہنچ جائے گی جو گزشتہ سال کے اختتام پر 8 لاکھ 98 ہزار600 تھی۔

الامارات الیوم کے مطابق ورلڈ ٹریول اینڈ ٹورازم کونسل نے نئی رپورٹ میں بتایا ہے کہ رواں سال سیاحت کے شعبے میں ملازمتوں کی تعداد گزشتہ سال کے مقابلے میں زیادہ ہو گی۔

2024 میں تقریباً 24 ہزار نئی ملازمتیں فراہم کی گئی تھیں۔ امارات میں ہر 8 میں سے ایک ملازمت کا تعلق ٹریول اینڈ ٹورزم  سیکٹر سے ہے۔

 اعدادوشمار کے مطابق امارات نے مشرق وسطی میں سیاحت کے شعبے میں دستیاب ملازمتوں کا 12.3 فیصد حصہ حاصل کیا۔ خطے میں اس شعبے سے منسلک افراد کی مجموعی تعداد 7.3 ملین تک پہنچ چکی ہے۔

 آنے والے برسوں میں ٹریول اینڈ ٹورازم سیکٹر سے وابستہ افراد کی تعداد امارات میں 10 لاکھ سے تجاوز کر جائے گی۔

 رپورٹ میں بتایا گیا کہ 2025 تک امارات کی معیشت میں سیاحتی شعبے کا حصہ 267.5 ارب درھم تک پہنچنے کا امکان ہے جو مجموعی پیداوار کا 13 فیصد ہے۔

علاوہ ازیں اماراتی وزارت معیشت و سیاحت کا کہنا ہے کہ سیاحتی شعبہ ملکی معیشت میں نمایاں کردار ادا کر رہا ہے۔ اس وقت جی ڈی پی میں حصہ 13 فیصد ہے۔ 2031 تک اسے 17 فیصد تک پہنچانے کا ہدف ہے۔

وزارت کے اعدادوشمار کے مطابق 2024 میں امارات میں ہوٹلوں کی آمدنی 45 ارب درھم رہی جو 2023 کے مقابلے میں 3 فیصد زیادہ ہے۔ ہوٹلوں میں رہائش کی اوسط شرح 78 فیصد ریکارڈ کی گئی جو دنیا بھر میں سب سے زیادہ ہے۔

 امارات میں 2024 کے اختتام تک ہوٹلوں کی مجموعی تعداد 1251 تک پہنچ چکی ہے۔ ان ہوٹلوں میں دستیاب کمروں کی تعداد بڑھ کر 2 لاکھ 16 ہزار 966 تک پہنچ چکی ہے جن میں ایک سال کے دوران 3 فیصد کا اضافہ ہوا۔