حج 2026 کی رجسٹریشن کا آخری روز، ڈھائی لاکھ پاکستانیوں کی درخواستیں جمع

پاکستان کے سرکاری میڈیا کے مطابق ملک بھر سے ڈھائی لاکھ کے قریب افراد نے اگلے سال حج کے لیے درخواست دی ہے جبکہ رجسٹریشن کے لیے دیا گیا وقت آج بدھ کو ختم ہو رہا ہے۔

عرب نیوز کے مطابق وزارت مذہبی امور نے حج 2026 کے لیے پچھلے مہینے رجسٹریشن پراسس شروع کرنے کا اعلان کیا تھا۔

بیان میں کہا گیا تھا کہ یہ سلسلہ نو جولائی تک جاری رہے گا اور اس کے بعد درخواست گزار سرکاری یا نجی حج سکیموں میں سے کسی ایک کا انتخاب کر سکیں گے۔

 حج کے خواہشمند افراد حکومت کی طرف سے مخصوص کیے گئے 15 بینکوں کے ذریعے رجسٹریشن کرا سکتے ہیں اور ان میں سے صرف وہی لوگ حج کے اہل ہوں گے جو تمام پراسس کو پورا کر چکے ہوں گے۔

رجسٹریشن کے لیے کسی قسم کی کوئی فیس مقرر نہیں کی گئی ہے۔

ریاستی خبر رساں ایجنسی اے پی پی کی جانب سے منگل کو کہا گیا تھا کہ ’حج رجسٹریشن کے لیے دیے گئے وقت میں ایک روز باقی ہے اور اب تک تقریباً ڈھائی لاکھ افراد اس پراسس کو مکمل کر چکے ہیں۔‘

بیان میں یہ بھی واضح کیا گیا تھا کہ نو جولائی حج رجسٹریشن کے لیے آخری روز ہے اور لوگ اس کے آن لائن بھی درخواست دے سکتے ہیں جبکہ اخراجات اور دوسرے شرائط و ضوابط الگ سے حج پالیسی کے مطابق جاری کیے جائیں گے۔

حج رجسٹریشن ان افراد کے لیے ضروری ہے جو پچھلی بار نجی سکیم میں شامل نہ ہو سکے تھے جبکہ اس کے ساتھ ساتھ یہ بیرون ملک مقیم پاکستانیوں کے لیے بھی لازمی ہے۔

پاکستان کو سعودی عرب کی جانب سے حج 2025 کے لیے ایک لاکھ 79 ہزار 210 افراد کا کوٹہ دیا گیا تھا جو کہ سرکاری اور نجی حج آپریٹرز کے درمیان یکساں طور  پر تقسیم کیا گیا تھا۔

تاہم نجی کوٹے کا بڑا حصہ کمپنیوں کی جانب سے بروقت ادائیگیاں اور رجسٹریشن نہ ہونے کے وجہ سے غیرمستعل رہا جبکہ سرکاری سطح پر کوٹہ پورا کر دیا گیا تھا جس میں 88 ہزار سے زائد زائرین شامل تھے۔

پرائیویٹ حج آپریٹرز کی جانب سے کوٹہ پورا نہ ہو سکنے کی وجہ تکنیکی مسائل کو قرار دیا گیا ہے۔