امارات کے نائب وزیراعظم سے وزیر داخلہ محسن نقوی کی ملاقات، ویزا مسائل پر تبادلہ خیال

وزیرِ داخلہ محسن نقوی کی ابوظہبی میں یو اے ای کے نائب وزیراعظم و وزیر داخلہ لیفٹیننٹ جنرل شیخ سیف بن زید النہیان سے ملاقات ہوئی ہے۔

وزارت داخلہ کی جانب سے جاری بیان کے مطابق یو اے ای پہنچنے پر وزیر داخلہ محسن نقوی کو گارڈ آف آنر پیش کیا گیا۔

محسن نقوی کی یو اے ای کی وزارت داخلہ کے اعلٰی حکام سے ملاقات ہوئی جس میں پاکستانی شہریوں کو درپیش ویزا کے مسائل پر تبادلہ خیال کیا گیا۔

بیان میں کہا گیا ہے کہ سکیورٹی تعاون، انسداد منشیات، انسداد سمگلنگ اور غیر قانونی امیگریشن کی روک تھام کے لیے اشتراک کار بڑھانے اور ٹیکنالوجی کے تبادلے پر بھی بات ہوئی

دونوں ممالک کے وزرائے داخلہ نے مختلف شعبوں میں دوطرفہ تعاون کو فروغ دینے کے عزم کا اعادہ کیا۔

ملاقات میں سکیورٹی چیلنجز سے نمٹنے کے لیے جدید ٹیکنالوجی بالخصوص آرٹیفشل انٹیلیجنس سے استفادہ کرنے کی ضرورت پر زور دیا گیا۔

بیان کے مطابق پاکستانی شہریوں کے لیے ویزا خصوصا ورک ویزا میں آسانیاں پیدا کرنے کے حوالے سے ضروری اقدامات پر اتفاق رائے کیا گیا، یو اے ای کے وزیر داخلہ نے ہر ممکن تعاون کی یقین دہانی کروائی ہے۔

اس موقع پر وزیر داخلہ محسن نقوی نے کہا کہ سکیورٹی سمیت دوطرفہ تعاون کے ہر شعبے میں تعاون کو مزید وسعت دینا چاہتے ہیں۔ 

انہوں نے مزید کہا کہ پاکستانیوں کی بڑی تعداد یواے ای کی معیشت کی مضبوطی میں کردار ادا کر رہی ہے، چاہتے کہ پاکستانی شہری آسانی سے یو اے ای آسکیں۔