عراق کے شاپنگ مال میں آتشزدگی، کئی اہلکار زیرحراست، متعدد معطل

عراق کے شاپنگ مال میں ہولناک آتشزدگی کی تحقیقات کرنے والی اعلی کمیٹی نے ابتدائی رپورٹ میں مجرمانہ غفلت قرار دیتے ہوئے متعدد حکومتی اہلکاروں کو تحقیقاتی ریمانڈ پرحراست میں لے لیا۔

چھ مقامی اہلکاروں کو حراست میں لیا گیا، ان میں شہری دفاع ادارے کے سربراہ اور الکوت میونسپلٹی کے اہلکار شامل ہیں۔ 17 ملازمین کو آئندہ نوٹس تک معطل کیا گیا ہے۔

سبق نیوز کے مطابق گزشتہ جمعرات کو عراق کے شہر الکوت کے شاپنگ مال میں ہولناک آتشزدگی سے 63 افراد ہلاک جبکہ 50 سے زائد زخمی ہوگئے تھے۔

عراقی وزارت داخلہ کے ترجمان کا کہنا تھا  وزیر اعظم محمد شیاع السودانی کے احکامات پرعمل کرتے ہوئے تحقیقاتی کمیٹی تشکیل دی گئی تھی۔ ابتدائی رپورٹ میں آگ لگنے کی وجہ مجرمانہ غفلت قراردیا گیا۔

ترجمان کا مزید کہنا تھا ابتدائی رپورٹ کو دیکھتے ہوئے 17 حکومتی اہلکاروں کے خلاف پرچہ درج کرکے انہیں تحقیقاتی ریمانڈ پر حراست میں لے لیا گیا، ان میں ڈائریکٹر شہری دفاع ، ڈائریکٹر سیاحی سیکیورٹی اور شہری دفاع کے دیگر اعلی عہدیدار شامل ہیں۔

واضح رہے شاپنگ مال کی پانچ منزلہ عمارت کا افتتاح ایک ہفتہ قبل ہوا تھا جس میں ہائپرمارکیٹ اور فوڈ کارنر کے علاوہ دیگر دکانیں بھی تھیں۔