لائیو: ایف آئی اے تفتان سرکل کی کارروائی، بارڈر کراسنگ میں ملوث 33 غیر ملکی گرفتار

اہم نکات:​

• ایف آئی اے تفتان سرکل کی کارروائی، بارڈر کراسنگ میں ملوث 33 غیر ملکی گرفتار

• ڈیگاری واقعہ: مقتول بانو بی بی کی والدہ دو روزہ ریمانڈ پر پولیس کے حوالے

• مون سون بارشوں کے باعث 143 افراد ہلاک، 488 افراد زخمی: پی ڈی ایم اے

• اسلام آباد: برساتی نالے میں بہہ جانے والے باپ بیٹی کی لاش مل گئی

• بولان ریلوے ٹریک کے قریب دھماکہ، ٹرین محفوظ رہی

بلوچستان: ضلع مستونگ میں سکیورٹی فورسز کا آپریشن: تین دہشت گرد ہلاک، ایک میجر اور سپاہی جان سے گئے

افواج پاکستان کے شعبہ تعلقات عامہ (آئی ایس پی آر) کا کہنا ہے کہ ’بلوچستان کے ضلع مستونگ میں سکیورٹی فورسز نے دہشت گردوں کی موجودگی کی اطلاع پر خفیہ اطلاعات پر آپریشن کیا۔‘
انہوں نے  بتایا کہ ’کارروائی کے دوران سکیورٹی فورسز نے تین دہشت گردوں کو ہلاک کردیا جبکہ میجر زیاد سلیم اور سپاہی ناظم حسین نے بہادری سے لڑتے ہوئے جامِ شہادت نوش کیا۔‘

ایف آئی اے تفتان سرکل کی کارروائی، بارڈر کراسنگ میں ملوث 33 غیر ملکی گرفتار

وفاقی تحقیقاتی ادارے (ایف آئی اے) کے اینٹی ہیومن ٹریفکنگ سرکل تفتان نے کارروائی کرتے ہوئے غیر قانونی طور پر بارڈر کراسنگ کی کوشش میں ملوث 33 ملزمان کو گرفتار کرلیا، جن کا تعلق بنگلہ دیش سے ہے۔

ترجمان ایف آئی اے کے بیان کے مطابق اینٹی ہیومن ٹریفکنگ سرکل تفتان نے بڑی کارروائی کے دوران غیر قانونی بارڈر کراسنگ میں ملوث 33 غیر ملکیوں کو گرفتار کیا ہے، گرفتار ملزمان کا تعلق بنگلہ دیش سے ہے جو وزٹ ویزے پرپاکستان آئے تھے۔

ترجمان کے مطابق ملزمان نے ماشکیل بارڈر ضلع چاغی سے بارڈر کراسنگ کی کوشش کی، کارروائی فرنٹیئر کور حکام کے تعاون سے عمل میں لائی گئی۔

ایف آئی اے کے ترجمان نے بتایا کہ گرفتار ملزمان قانونی دستاویزات طلب کرنے پر تسلی بخش جواب نہیں دے سکے، ملزمان کو گرفتار کر کے تفتیش کا آغاز کر دیا گیا ہے۔

پی این ایس ساہیوال گن بوٹ کی لانچنگ تقریب

پاک بحریہ کے لیے مقامی طور پر تیار کردہ پی این ایس ساہیوال گن بوٹ کی لانچنگ تقریب کا کراچی شپ یارڈ اینڈ انجینئرنگ ورکس میں انعقاد ہوا۔

آئی ایس پی آر کے مطابق وائس چیف آف دی نیول سٹاف، وائس ایڈمرل اویس احمد بلگرامی اس موقع پر مہمان خصوصی تھے۔

مہمانِ خصوصی نے پاک بحریہ کے پلیٹ فارم ڈیزائن وِنگ اور کراچی شپ یارڈ اینڈ انجینئرنگ ورکس کی مشترکہ کاوشوں کو سراہا۔

مقامی طور پر تیار کردہ گن بوٹ میں طویل فاصلے تک مار کرنے والی سیمی آٹومیٹک گنز نصب کی جائیں گی۔

آئی ایس پی آر کے مطابق یہ جدید ترین گن بوٹ مختلف بحری سکیورٹی آپریشنز  سرانجام دینے کی بھرپور صلاحیت رکھتی ہے۔

پاک بحریہ مستقبل میں اس طرز کی مزید گن بوٹس بنانے پر غور کر رہی ہے۔

لانچنگ تقریب میں پاک بحریہ کے اعلیٰ حکام،وزارتِ دفاعی پیداوار، کراچی شپ یارڈ اینڈ انجینئرنگ ورکس اور شپ بلڈنگ انڈسٹری کے نمائندگان نے شرکت کی۔

انڈیا کو فیصلہ کرنا ہو گا کہ وہ کونسی پالیسی اپناتا ہے: دفتر خارجہ

ترجمان دفتر خارجہ شفقت علی خان نے کہا ہے کہ پاکستان انڈیا کو سنجیدہ مذاکرات کی دعوت دے چکا ہے، انڈیا کو فیصلہ کرنا ہو گا کہ وہ کونسی پالیسی اپناتا ہے۔

اسلام آباد میں ہفتہ وار پریس بریفنگ کے دوران انہوں نے بتایا کہ نائب وزیر اعظم و وزیر خارجہ اسحاق ڈار اعلیٰ سطح کے دورے پر امریکہ میں ہیں، انہوں نے یو این سیکریٹری جنرل اور صدر سے الگ الگ ملاقاتیں کیں۔

ترجمان دفتر خارجہ نے کہا کہ اسحاق ڈار نے یو این سلامتی کونسل میں غزہ اور فلسطین کے معاملے پر بات کی، انہوں نے مشرق وسطیٰ کی صورتحال پر کھلی بحث میں بھی شرکت کی۔

انہوں نے کہا کہ جموں و کشمیر اور فلسطین کے معاملات پر پاکستان نے عالمی فورمز پر آواز بلند کی، پاکستان کی صدارت میں سلامتی کونسل نے قرارداد 2788 متفقہ طور پر منظور کی، قرارداد میں تنازعات کے پُرامن حل کے لیے اقوام متحدہ کے چارٹر کے تحت اقدامات پر زور دیا گیا۔

ترجمان دفتر خارجہ شفقت علی خان نے مزید بتایا کہ وزیر خارجہ نے فلسطینی علاقوں میں اسپتالوں اور اسکولوں پر حملوں کی مذمت کی، پاکستان نے غزہ میں جنگ بندی، امدادی رسائی اور 2 ریاستی حل پر زور دیا۔

سندھ طاس معاہدہ، پاکستان کا عالمی بینک کے موقف کا خیرمقدم

وزیراعظم شہباز شریف نے انڈیا کی جانب سے سندھ طاس معاہدے کی یکطرفہ معطلی کے خلاف عالمی بینک کے مؤقف کا خیرمقدم کرتے ہوئے اسے پاکستان کی ’اُصولی حمایت‘ قرار دیا۔

عرب نیوز کے مطابق شہباز شریف نے جمعرات کو بینک کے علاقائی نائب صدر عثمان ڈیون سے ملاقات کی جو اس وقت پاکستان کے دورے پر ہیں۔

وزیراعظم نے سندھ طاس معاہدے سے متعلق مؤقف کیلئے عالمی بینک کی اصولی حمایت کو سراہا اور بین لاقوامی قانون کی پاسداری اور علاقائی امن کو برقرار رکھنے کیلئے پاکستان کے عزم کا اعادہ کیا۔

وزیر اعظم نے کہا  کہ ورلڈ بینک کی مدد پاکستان کی ترقی میں اہم ہے، دونوں اداروں کے درمیان تعاون مزید مضبوط ہوگا۔

وزیراعظم نے طویل شراکت داری پر عالمی بینک کا شکریہ ادا کرتے ہوئے پاکستان کی ترقی کی ترجیحات بالخصوص توانائی، انسانی وسائل، موسمیاتی تبدیلی اور گورننس اصلاحات پر تعریف کی۔

ڈیگاری واقعہ: مقتول بانو بی بی کی والدہ بھی گرفتار

کوئٹہ میں دوہرے قتل کے واقعے میں پولیس نے مقتول بانو بی بی کی والدہ گل جان کو بھی گرفتار کر لیا ہے۔

جمعرات کو گرفتار خاتون کو انسداد دہشت گردی عدالت کوئٹہ میں پیش کیا گیا۔ عدالت نے پولیس کی استدعا پر مقتول کی والدہ کو دو روزہ ریمانڈ پر پولیس کے سیریس کرائم انویسٹی گیشن ونگ کے حوالے کر دیا ہے۔

بلوچستان میں ایک مقامی سردار کے فیصلے کے نتیجے میں ’کاروکاری کے الزام‘ میں ایک خاتون اور مرد کے لرزہ خیز قتل میں ملوث 11 ملزموں کو گرفتار کیا گیا تھا۔

پولیس نے معاملے کو ’غیرت کے نام پر قتل‘ کا واقعہ قرار دیتے ہوئے کہا ہے یہ ڈیڑھ مہینہ پرانا اور کوئٹہ کے نواحی علاقے مارگٹ کے قریب پیش آیا تاہم اس کی ویڈیوز اتوار کو سامنے آئیں۔

پولیس کا کہنا ہے کہ واردات میں خاتون کے بھائی، قریبی رشتہ دار اور قبیلے کے دوسرے افراد بھی ملوث ہیں جنہوں نے قبائلی سردار کی جانب سے خاتون اور مرد کو ’کاروکاری‘ قرار دیتے ہوئے جان سے مارنے کا فیصلہ سنایا۔

ابتدائی تحقیقات کی بنیاد پر پولیس نے چھاپے مار کر قبائلی سردار اور خاتون کے قریبی رشتہ دار سمیت متعدد افراد کو گرفتار کیا۔

توہین مذہب کے الزامات پر کمیشن تشکیل دینے کا فیصلہ معطل

اسلام آباد ہائیکورٹ کے ڈویژن بینچ نے توہین مذہب کے الزامات پر کمیشن تشکیل دینے کے فیصلے پر عمل درآمد روک دیا ہے۔

عدالت نے سنگل بنچ جسٹس سردار اعجاز اسحاق کا کمیشن تشکیل دینے کا فیصلہ معطل کر دیا ہے۔

ڈویژن بنچ نے محفوظ شدہ فیصلہ سناتے ہوئے فریقین کو نوٹسسز جاری کر دیے ہیں۔

جسٹس سردار اعجاز اسحاق نے کمیشن بنانے کا فیصلہ جاری کیا تھا۔

تشدد سے طالب علم کی ہلاکت:ملزمان دوروزہ جسمانی ریمانڈ پر پولیس کے حوالے

خیبرپختونخوا کے ضلع سوات میں مدرسے میں زیرتعلیم کم سن طالب علم  کی مبینہ طور پر تشدد کی وجہ سے موت کے الزام میں گرفتار ملزمان کو دوروزہ جسمانی ریمانڈ پر پولیس کے حوالے کردیا گیا ہے۔

پولیس کے مطابق 21 جولائی کو خوازہ خیلہ کے مدرسے کے طالب علم فرحان کو نیم بے ہوشی کی حالت میں قریبی ہسپتال منتقل کیا گیا تھا جہاں وہ دم توڑ گیا۔

ابتدائی میڈیکل رپورٹ سے یہ معلوم ہوا ہے کہ طالب علم پر تشدد کیا گیا تھا اور اس کے جسم پر تشدد کے واضح نشان تھے۔

مرکزی ملزم مدرسے کے مہتمم سمیت دو افراد تاحال گرفتار نہ ہوسکے۔ ملزمان کی گرفتاری کے لیے پولیس نے ٹیمیں تشکیل دے دی ہیں۔

آٹھ لاکھ سے زائد چوری شدہ موبائل فونز بلاک: پی ٹی اے

پاکستان ٹیلی کمیونیکیشن اتھارٹی (پی ٹی اے) نے آٹھ لاکھ 26 ہزار چوری شدہ موبائل فونز بلاک کر دیے ہیں۔

پی ٹی اے کی رپورٹ میں بتایا گیا ہے کہ پانچ کروڑ 50 لاکھ جعلی یا نقل شدہ موبائل فونز بھی بلاک کیے گئے ہیں۔ 

بلاکنگ نظام ڈی آئی آر بی ایس کے تحت رپورٹ شدہ ڈیوائسز پر کارروائی کی گئی۔ 2019 سے اب تک 13 کروڑ 60 لاکھ موبائل فونز مقامی سطح پر تیار ہوئے۔

رپورٹ کے مطابق پاکستان میں تیار شدہ فونز میں 37 فیصد سمارٹ فونز شامل ہیں۔ 2024 میں 3 کروڑ 13 لاکھ 80 ہزار فونز مقامی سطح پر تیار کیے گئے۔

بولان ریلوے ٹریک کے قریب دھماکہ

بلوچستان کے علاقے بولان میں ریلوے ٹریک کے قریب دھماکے سے ایک بوگی کو جزوی نقصان پہنچا ہے۔

ریلوے ذرائع کے مطابق کراچی سے کوئٹہ آنے والی ٹرین کو نشانہ بنایا گیا۔ ٹرین محفوظ رہی تاہم، بوگی نمبر سات کو جزوی نقصان پہنچا۔

میں نے ملالہ کو ایوارڈ دیا جس کے بعد دنیا نے ایوارڈ دیا: چیئرمین سینیٹ

چیئرمین سینیٹ یوسف رضا گیلانی نے کہا ہے کہ ’میں کئی سال سے امن کے لیے کام کیا، میرے ملالہ یوسفزئی کو ایوارڈ دینے کے تین سال بعد دنیا نے انہیں ایوارڈ سے نوازا۔‘

ضم شدہ اضلاع کے قبائلی جرگے سے خطاب کرتے ہوئے چیئرمین سینیٹ یوسف رضا گیلانی نے کہا کہ ’میرے دور میں سوات، مالاکنڈ اور جنوبی وزیرستان آپریشن ہوا۔ ہم نے تمام سٹیک ہولڈرز سے مشاورت کے بعد آپریشن کیا۔‘

انہوں نے بتایا کہ آپریشن کی وجہ سے 25 لاکھ افراد بےگھر ہوئے جنہیں 90 روز میں واپس اپنے علاقوں میں آباد کیا۔ 

یوسف رضا گیلانی کا کہنا تھا کہ جب تک انصاف نہیں ہوگا تب تک امن نہیں آ سکتا۔

کوریئر سروسز کے نمائندے کی جانب سے موصول پیغامات سے ہوشیار رہیں: پی ٹی اے

پاکستان ٹیلی کمیونیکیشن اتھارٹی کی جانب سے عوام کو کوریئر سروسز کے نمائندے کی جانب سے موصول پیغامات سے ہوشیار رہنے کی ہدایت کی گئی ہے۔

پی ٹی اے کی جانب سے جاری کردہ بیان میں کہا گیا ہے کہ ’عوام  ایسے جعلی پیغامات سے محتاط رہیں جن میں کوریئر سروسز کے نمائندہ کی جانب سے صارف کو فون کال کے ذریعے ویریفکیشن کوڈ سے متعلق معلومات طلب کی جا رہی ہیں۔‘

بیان کے مطابق ’ایس ایم ایس یا میسجنگ ایپس کے ذریعے موصول ہونے والا کوئی بھی کوڈ کسی کے ساتھ ہر گز شیئر نہ کریں، کیونکہ یہ کوڈ آپ کے اکاؤنٹس یا ڈیجیٹل شناخت تک غیر مجاز رسائی کے لیے استعمال کیا جا سکتا ہے۔‘

پی ٹی اے نے مزید کہا کہ کہ مستند کوریئر کمپنیاں پارسل کی ترسیل کے لیے صارفین سے کسی قسم کے کوڈ سے متعلق معلومات طلب نہیں کرتیں۔

دہشت گرد سوشل میڈیا کے ذریعے معاشرے میں تقسیم پیدا کر رہے ہیں: عطا تارڑ

وفاقی وزیر اطلاعات عطا تارڑ نے کہا ہے کہ دہشت گرد اپنے نظریات کی ترویج سوشل میڈیا کے ذریعے کر رہے ہیں۔

اسلام آباد میں تقریب سے خطاب کرتے ہوئے انہوں نے کہا کہ سوشل میڈیا پلیٹ فارمز کی جانب سے انتہا پسندی کے نظریات کی ترویج کی اجازت دینا حیران کن ہے۔

عطا تارڑ نے کہا کہ دہشت گرد سوشل میڈیا کے ذریعے معاشرے میں تقسیم اور نفرت پیدا کر رہے ہیں۔

ان کا کہنا تھا کہ دہشت گردی اور انتہا پسندی کے خاتمے کے لیے خصوصی قوانین وقت کی ضرورت ہیں۔ دہشت گردی کے ملزمان کے خلاف فرد جرم عائد کیے جانے کی شرح بہت کم ہے۔

143 افراد ہلاک اور 488 افراد زخمی، مون سون فیکٹ شیٹ جاری

پنجاب میں قدرتی آفات سے نمٹنے والے ادارے پی ڈی ایم اے نے مون سون فیکٹ شیٹ جاری کر دی ہے۔

پی ڈی ایم اے کی جانب سے جاری رپورٹ میں بتایا گیا ہے کہ رواں سال مون سون بارشوں کے باعث 143 افراد ہلاک اور 488 افراد زخمی ہوئے جبکہ 200 سے زیادہ مکانات متاثر ہوئے۔

ترجمان پی ڈی ایم اے کا کہنا ہے کہ آئندہ 24 گھنٹوں میں لاہور راولپنڈی سمیت پنجاب کے بیشتر اضلاع میں بارشوں کے امکانات ہیں۔ پنجاب کے دریاؤں اور ندی نالوں میں طغیانی کا خدشہ ہے۔

ترجمان کے مطابق گزشتہ 24 گھنٹوں میں پنجاب کے بیشتر اضلاع میں مون سون بارشیں ریکارڈ کی گئیں۔ سرگودھا میں 69 ملی میٹر، نورپور تھل 59، منڈی بہاؤالدین 50، حافظ آباد 44 اور شیخوپورہ میں 32 ملی میٹر بارش ریکارڈ کی گئی۔

پی ڈی ایم اے کے ترجمان کے مطابق مون سون بارشوں کا چوتھا سلسلہ 25 جولائی تک جاری رہے گا۔

اسلام آباد میں بہہ جانے والے کرنل (ر) اسحاق کی لاش مل گئی، بیٹی کی تلاش جاری

اسلام آباد کی نجی ہاؤسنگ سوسائٹی کے نالے میں گاڑی سمیت بہہ جانے والے کرنل ریٹائرڈ اسحاق قاضی  کی لاش مل گئی ہے جبکہ اُن کی بیٹی کی تلاش جاری ہے۔

جمعرات کی دوپہر ریسکیو حکام  نے تصدیق کی کہ منگل کی صبح بیٹی سمیت کار میں بہہ جانے والے اسحاق قاضی کی لاش کو تلاش کر لیا گیا۔

ریسکیو حکام نے کہا ہے کہ لاش برسائی نالے میں ایک جگہ سے ملی ہے۔

منگل کی صبح تیز بارش کے دوران گھر کے قریب سڑک پر جمع پانی میں گاڑی میں سوار بزرگ شہری اسحاق قاضی اور اُن کی بیٹی بہہ گئے تھے۔

دونوں کی تلاش میں تیسرے دن بھی سرچ و ریسکیو آپریشن کے دوران اہلکاروں کو ایک لاش ملی جس کی شناخت کی گئی۔

احتجاج کیس: عمر ایوب کے قابل ضمانت وارنٹ جاری

اسلام آباد کی انسداد دہشت گردی کی عدالت نے احتجاج کے کیس میں پاکستان تحریک انصاف (پی ٹی آئی) کے رہنما عمر ایوب کے قابل ضمانت وارنٹ جاری کردیے ہیں۔

انسداد دہشت گردی کی عدالت کے جج طاہر عباس سِپرا نے عمر ایوب، اعظم سواتی و دیگر کارکنان کے خلاف 4 اکتوبر کو احتجاج کے کیسز کی سماعت کی۔

عدالت نے پی ٹی آئی کے سینیٹر اعظم خان سواتی کی حاضری سے استثنیٰ کی درخواست منظور کر لی۔ عدالت نے غیر حاضر ملزمان کے ضمانتی مچلکے ضبط کرنے کا حکم دیتے ہوئے کیس کی سماعت 30 جولائی تک ملتوی کر دی۔

بلوچستان: مچھ کے علاقے میں  ہینڈ گرنیڈ دھماکہ

بلوچستان کے ضلع بولان کی تحصیل مچھ میں ہینڈ گرنیڈ دھماکے کے نتیجے میں ایک شخص ہلاک جبکہ تین زخمی ہوگئے۔

ایس ایس پی کچھی کے مطابق مچھ کے علاقے آب گم میں نامعلوم افراد نے گھر کے باہر بیٹھے چار افراد پر ہینڈ گرنیڈ پھینکا۔ دھماکے سے ایک شخص ہلاک تین افراد شدید زخمی ہو گئے جنہیں ہسپتال منتقل کیا گیا۔

ملزم رات کی تاریکی کا فائندہ اُٹھاتے ہوئے فرار ہو گئے تاہم علاقے کو گھیرے میں لے کر کارروائی شروع کر دی گئی ہے۔

پاکستان میں اصلاحات اور ڈیجیٹائزیشن سے سرمایہ کاروں کا اعتماد بڑھا ہے،اسحاق ڈار

نائب وزیراعظم و وزیرخارجہ اسحاق ڈار نے نیویارک میں معروف سرمایہ کاروں، بینکنگ اور آئی ٹی پرفیشنلز سے ملاقات کی اور پاکستان کے بہتر ہوتے ہوئے میکرو اکنامک اشاریوں پر روشنی ڈالی۔

ترجمان دفتر خارجہ کے بیان کے مطابق اسحاق ڈار نے خصوصی سرمایہ کاری کو آسان بنانے کے لیے قائم کردہ کونسل (ایس آئی ایف سی) کے تحت زراعت، آئی ٹی، معدنیات، توانائی اور سیاحت جیسے شعبوں میں ہونے والی اصلاحات پر توجہ دلائی۔

انہوں نے پاکستان کے بہتر ہوتے ہوئے میکرو اکنامک اشاریوں پر روشنی ڈالی جن میں 14 سال میں پہلی بار کرنٹ اکاؤنٹ سرپلس، افراط زر میں کمی، اور عالمی اداروں کی جانب سے ملکی کریڈٹ ریٹنگز میں بہتری شامل ہیں۔

نائب وزیراعظم نے خصوصی سرمایہ کاری کو آسان بنانے کے لیے قائم کردہ کونسل (ایس آئی ایف سی) کے تحت زراعت، آئی ٹی، معدنیات، توانائی اور سیاحت جیسے شعبوں میں ہونے والی اصلاحات پر بھی توجہ دلائی۔

انہوں نے فنانس، بینکنگ اور آئی ٹی شعبوں کے معاشی ترقی میں کردار پر زور دیتے ہوئے پاکستان میں فِن ٹیک، انفراسٹرکچر، پائیدار فنانس، اثاثوں کی ڈیجیٹلائزیشن، اور ڈیجیٹل بینکنگ کے مواقع پر بات کی۔

چیئرمین پی سی بی کی بنگلہ دیش کے امپائرز کو پاکستان میں ٹریننگ دینے کی پیشکش

وفاقی وزیرداخلہ و چئیرمین پی سی بی محسن نقوی نے بنگلہ دیش کے مشیر برائے امور نوجوانان اور کھیل آصف محمود سے ملاقات کی۔

ملاقات میں دونوں ممالک کے درمیان کھیلوں خصوصا کرکٹ کے فروغ و ایمپائرز ڈویلپمنٹ پروگرامز کے لیے تعاون پر اتفاق کیا گیا۔

محسن نقوی نے بنگلہ دیش کے ایمپائرز کو پاکستان میں ٹریننگ کی دعوت دی۔ دونوں رہنماؤں نے وویمنز کرکٹ ڈویلپمنٹ پروگرامز کے لیےاشتراک کار بڑھانے پر بات چیت کی۔

 ملاقات میں فیصلہ کیا گیا کہ سپورٹس کے فروغ کے لیے پی سی بی اور بی سی بی میں باقاعدہ معاہدہ کیا جائے گا۔