فیلڈ مارشل عاصم منیر کی چین میں اعلیٰ سیاسی و عسکری قیادت سے ملاقاتیں

پاکستان کے چیف آف آرمی سٹاف فیلڈ مارشل عاصم منیر نے عوامی جمہوریہ چین کا سرکاری دورہ کیا۔

جمعے کو آئی ایس پی آر کی طرف سے جاری پریس ریلیز کے مطابق دورے کے دوران انہوں نے بیجنگ میں چین کی اعلیٰ سیاسی اور عسکری قیادت کے ساتھ اعلیٰ سطحی ملاقاتیں کیں جن میں پاکستان اور چین کے درمیان سٹریٹجک شراکت داری کا اعادہ کیا گیا۔

فیلڈ مارشل نے چین کے نائب صدر ہان ژینگ اور چین کے وزیر خارجہ وانگ یی سے ملاقات کی۔ بات چیت میں علاقائی اور عالمی سیاسی منظر نامے، چین پاکستان اقتصادی راہداری سی پیک کے تحت اقدامات اور مشترکہ جغرافیائی سیاسی چیلنجوں کے لیے مربوط ردعمل کی ضرورت پر توجہ مرکوز کی گئی۔

چینی عسکری قیادت نے دوطرفہ دفاعی شراکت داری کی مضبوطی پر مکمل اعتماد کا اعادہ کیا اور علاقائی امن کے فروغ میں پاکستان کے کلیدی کردار کا اعتراف کیا۔

عسکری جانب سے فیلڈ مارشل عاصم منیر نے سینٹرل ملٹری کمیشن (سی ایم سی) کے وائس چیئرمین جنرل ژانگ یوشیا، پی ایل اے آرمی کے پولیٹیکل کمشنر جنرل چن ہوئی اور پی ایل اے آرمی کے چیف آف سٹاف لیفٹیننٹ جنرل کائی ژائی جون سے ملاقاتیں کیں۔ پی ایل اے آرمی ہیڈ کوارٹر پہنچنے پر فیلڈ مارشل کو گارڈ آف آنر پیش کیا گیا۔

ان ملاقاتوں میں دفاعی اور سکیورٹی تعاون پر جامع تبادلے شامل تھے، بشمول انسداد دہشت گردی تعاون، مشترکہ تربیت، دفاع، اور ادارہ جاتی روابط میں اضافہ۔

اس کے علاوہ ہائبرڈ اور بین الاقوامی خطرات کا مقابلہ کرنے کے لیے آپریشنل انٹرآپریبلٹی اور سٹریٹجک کوآرڈینیشن کو بہتر بنانے پر زور دیا گیا۔ چینی عسکری قیادت نے دوطرفہ دفاعی شراکت داری کی مضبوطی پر مکمل اعتماد کا اعادہ کیا اور علاقائی امن کے فروغ میں پاکستان کے کلیدی کردار کا اعتراف کیا۔

فیلڈ مارشل عاصم منیر نے چین کی مسلسل حمایت کو سراہا اور تمام شعبوں میں ملٹری ٹو ملٹری تعاون کو مزید وسعت دینے کے پاکستان کے عزم کا اعادہ کیا۔