سعودی طالبعلم نے نیوکلیئر سائنس اولمپیارڈ 2025 میں کانسی کا تمغہ جیت لیا

سعودی طلبا نے ملائیشیا کے میں ہونے والے دوسرے انٹرنیشنل نیوکلیئر سائنس اولمپیارڈ 2025 میں کانسی کا تمغہ حاصل کیا ہے۔

سرکاری خبررساں ادارے ’ایس پی اے‘ کے مطابق 30 جولائی سے 6 اگست  تک کوالالمپور میں جاری رہنے والے اولمپیارڈ میں14 ممالک کے 56 طلبا نے شرکت کی۔

سعودی طلبا کو اس مقابلے لیے کنگ عبدالعزیز اینڈ کمپینیئنز فاؤنڈیشن فار گفٹڈنیس اینڈ کریٹیویٹی کی جانب سے معنقدہ سخت تربیتی اور انتخابی مراحل کے بعد منتخب کیا گیا۔

یہ انتخاب وزارت تعلیم، کنگ عبدالعزیز سٹی برائے سائنس و ٹیکنالوجی اور کنگ عبدالعزیز سٹی برائے ایٹمی و قابل تجدید توانائی کے اشتراک سے مکمل کیا گیا۔

 جدہ ایجوکیشن ڈیپارٹمنٹ سے عزام خالد العمری نے مقابلہ میں کانسی کا تمغہ حاصل کیا۔

سعودی طلبا کی ٹیم میں عزام خالد العمری کے علاوہ مدینہ ایجوکیشن ڈیپارٹمنٹ سے البرا سعید عواجی، جبیل رائل کمیشن سے ابراہیم عبدالعزیز العثمان اور الاحسا ایجوکیشن ڈیپارٹمنٹ سے حسن علی العوض شامل تھے۔

یاد رہے سعودی طلبا کی ٹیم نے اولپمیارڈ کے پہلے ایڈیشن میں چار ایوارڈ حاصل  کیے۔ ان میں ایک چاندی اور تین کانسی کے تمغے شامل ہیں۔

انٹرنیشنل نیوکلیئر سائنس اولمپیاڈ جو 2024 میں انٹرنیشنل اٹامک انرجی ایجنسی کے تحت قائم کی گئی تھی، ایک عالمی سائنسی پلیٹ فارم ہے۔

اس مقابلے کا مقصد نیوکلیئر ٹیکنالوجی کے پرامن اور محفوظ استعمال کو فروغ دینا، نوجوانوں کو اس شعبے میں مہارت حاصل کرنے اور جدت لانے کی ترغیب دینا ہے۔