امریکی محکمہ صحت پر فائرنگ، حملہ آور نے کرونا ویکسین کو وجہ قرار دیا

امریکی ریاست جارجیا کے شہر اٹلانٹا میں بیماریوں کی روک تھام کے ادارے (سی ڈی سی) کے ہیڈکوارٹر پر فائرنگ کا واقعہ پیش آیا جس میں ایک پولیس اہلکار مارا گیا ہے۔

حکام کے مطابق حملہ آور کی شناخت 30 سالہ پیٹرک جوزف وائٹ کے طور پر کی گئی ہے جو کرونا وبا کی ویکسین کو اپنے ڈپریشن اور خودکشی کے خیالات کی وجہ سمجھتا تھا۔

خبر رساں ایجنسی اے پی کے مطابق یہ واقعہ جمعے کی شام کو اس وقت پیش آیا جب حملہ آور پیٹرک جوزف وائٹ نے سی ڈی سی ہیڈکوارٹر میں گھسنے کی کوشش کی جسے سکیورٹی اہلکاروں نے ناکام بنا دیا۔

اس کے بعد حملہ آور سڑک کے پار واقع ایک فارمیسی کے باہر پہنچا اور فائرنگ شروع کردی۔ رپورٹ کے مطابق حملہ آور کے پاس پانچ ہتھیار تھے جس میں ایک بڑی گن بھی شامل تھی۔

فائرنگ کے نتیجے میں ڈیکالب کاؤنٹی کے پولیس افسر ڈیوڈ روز گولی لگنے سے شدید زخمی ہوئے اور بعد میں دم توڑ گئے۔ روز ڈیوڈ کی عمر 33 برس تھی اور وہ پولیس نوکری سے قبل میرین بھی رہ چکے تھے۔ ان کے پسماندگان میں ایک بیوی اور تین بچے شامل ہیں۔

جارجیا بیورو آف انویسٹی گیشن کے مطابق حکام نے یہ واضح نہیں کیا ہے کہ حملہ آور پولیس کی گولی کا نشانہ بنا یا پھر اس نے خودکشی کی تاہم ایک قانون نافذ کرنے والے اہلکار کے مطابق حملہ آور کے والد نے پولیس سے رابطہ کرکے بتایا ہے کہ ممکنہ طور پر فائرنگ کرنے والا ان کا بیٹا ہے۔

حملہ آور کے والد کے مطابق ان کا بیٹا اپنے کتے کی موت کے بعد سخت ڈیپریشن کا شکار تھا اور کرونا وبا کی ویکسین کے خلاف سخت خیالات رکھتا تھا۔

حملہ آور پیٹرک جوزف وائٹ کی پڑوسن نینسی ہوالسٹ نے مقامی اخبار کو بتایا ہے کہ ’پیٹرک جوزف وائٹ اکثر کویڈ ویکسین مخالف گفتگو کرتا تھا اور اس بات پر قائل تھا کہ ویکسین لوگوں کو نقصان پہنچا رہی ہے تاہم میں نے کبھی نہیں سوچا تھا کہ وہ اس بنیاد پر کوئی ایسا پرتشدد قدم اٹھائے گا۔‘

امریکی وزیر صحت رابرٹ ایف کینیڈی جونیئر نے پولیس افسر کی موت پر افسوس کا اظہار کرتے ہوئے کہا ہے کہ ’عوامی صحت کے کارکنوں کو اپنا کام کرتے وقت تشدد کا سامنا نہیں کرنا چاہیے۔‘

تاہم سی ڈی سی کے برطرف شدہ ملازمین کے گروپ ’فائرڈ بٹ فائٹنگ‘ نے کینیڈی پر الزام لگایا ہے کہ ان کے بیانات نے ادارے کے خلاف نفرت کو ہوا دی اس لیے انہیں استعفیٰ دینا چاہیے۔