فرانس میں ریفریجریٹر والے مال بردار ٹرک سے تارکینِ وطن کی بازیابی

شمالی فرانس میں برطانیہ جانے والے ایک ریفریجریٹر والے مال بردار ٹرک سے اریٹریا کے 15 تارکینِ وطن برآمد ہوئے، جنہیں شدید سردی کے باعث ہائپوتھرمیا لاحق ہو گیا۔

فرانسیسی حکام نے خبر رساں ادارے اے ایف پی کو بتایا کہ متاثرہ افراد کا طبی علاج کیا گیا، جن میں سے چار کو ہسپتال میں داخل کرنا پڑا۔

یہ واقعہ سنیچر اس وقت پیش آیا جب مراکشی ڈرائیور نے موٹر وے پر ایک آرام گاہ پر رکنے کے بعد ٹرک کے اندر سے مدد کی آوازیں سنیں۔ پاس ڈی کلیس کے مقامی پریفیکچر آفس کے اعلیٰ افسر کرسچین ویڈیلاگو نے بتایا کہ متاثرین کی حالت سے ظاہر ہوتا ہے کہ وہ کئی گھنٹوں سے ٹرک میں موجود تھے۔

ان کا کہنا تھا کہ متاثرہ افراد میں ایک خاتون بھی شامل ہے، جب کہ چار نابالغوں کو ایک فلاحی تنظیم کی تحویل میں دے دیا گیا ہے۔ حکام کے مطابق کچھ افراد کو پہلے ہی فرانس چھوڑنے کے سرکاری احکامات جاری کیے جا چکے تھے۔

ویڈیلاگو کے مطابق ٹرک ڈرائیور، جو منجمد سبزیاں لے جا رہا تھا، سے تحقیقات نہیں کی جا رہیں۔

خیال رہے کہ شمالی فرانس سے برطانیہ جانے والے راستوں، بشمول بندرگاہوں اور کراس چینل سرنگ پر سکیورٹی چیکنگ کے باوجود تارکینِ وطن غیرقانونی طریقوں سے برطانیہ پہنچنے کی کوشش کرتے ہیں۔ اگرچہ اب زیادہ تر افراد چھوٹی کشتیوں کے ذریعے سمندر عبور کرنے کو ترجیح دیتے ہیں، تاہم ٹرکوں میں چھپ کر جانے کی کوششیں بھی جاری ہیں۔