کراچی سے خلیجی ممالک اور اندرون ملک پی آئی اے کا آپریشن متاثر، کئی پروازیں منسوخ

پاکستان سے خلیجی ممالک جانے والی پروازوں سمیت قومی ایئرلائن پی آئی اے کا کراچی آپریشن شدید متاثر ہو گیا ہے۔

 کراچی میں بارش اور خراب موسم کے باعث کئی اہم پروازیں منسوخ اور تاخیر کا شکار ہو گئی ہیں۔

پی آئی اے کے ترجمان عبداللہ حفیظ خان نے اردو نیوز کو بتایا کہ ’کراچی سے جدہ جانے والی پرواز پی کے 731 اور کراچی سے مدینہ منورہ روانہ ہونے والی پرواز پی کے 843 تاخیر کا شکار ہیں جبکہ کراچی نجف کراچی پرواز پی کے 109/110 بھی مسافروں کے بروقت نہ پہنچنے کے سبب مقررہ وقت پر روانہ نہ ہو سکی۔‘

انہوں نے بتایا کہ ان پروازوں کی روانگی موسم بہتر ہونے اور مسافروں کی آمد کے بعد متوقع ہے۔

اس کے علاوہ کراچی سے کوئٹہ آنے اور جانے والی پروازیں پی کے 310/311 اور کراچی سے اسلام آباد کی پروازیں پی کے 308/309 منسوخ کر دی گئی ہیں۔

لاہور سے کراچی آنے والی پرواز پی کے 305 بھی لاہور ایئرپورٹ پر تاخیر کا شکار ہے اور موسم بہتر ہونے کے بعد روانہ کی جائے گی۔

کراچی سے اسلام آباد جانے والی پرواز پی کے 370 بھی تاخیر کا شکار ہوئی ہے جس کی متوقع روانگی صبح ساڑھے نو بجے بتائی گئی ہے۔

مزید برآں کل صبح کی شیڈول پروازیں پی کے 300/301 (کراچی اسلام آباد کراچی) بھی موسم کی شدت کے باعث منسوخ کردی گئی ہیں۔

پی آئی اے کے ترجمان نے کہا ہے کہ ’پی آئی اے نے تمام مسافروں سے اپیل کی ہے کہ وہ ایئرپورٹ روانہ ہونے سے پہلے اپنی پروازوں کے اوقات اور روٹس کی تازہ صورتحال جاننے کے لیے پی آئی اے کال سینٹر (786-786-111) سے رابطہ کریں۔‘

ترجمان کے مطابق ’موسم کے باعث شیڈول میں تعطل پر ایئرلائن مسافروں سے معذرت خواہ ہے اور معمولات کو جلد از جلد بحال کرنے کی بھرپور کوششیں جاری ہیں۔‘