کنگ سلمان مرکز کی جانب سے خیبرپختونخوا کے بارشوں سے متاثرہ علاقوں کے لیے امداد

پاکستان ایک بار پھر قدرتی آفت کی زد میں ہے۔ صوبہ خیبرپختونخوا کے مختلف اضلاع میں حالیہ بارشوں اور طوفانی سیلابوں نے نظامِ زندگی مفلوج کر کے رکھ دیا ہے۔ ہزاروں خاندان اپنے گھر بار اور بنیادی سہولیات سے محروم ہو گئے ہیں۔ 

ایسے نازک وقت میں پاکستان کے دیرینہ دوست سعودی عرب نے ایک بار پھر اپنی بھرپور امدادی سرگرمیوں کا آغاز کیا ہے۔

امدادی سرگرمیوں کے پہلے مرحلے میں کنگ سلمان ہیومینیٹرین ایڈ اینڈ ریلیف سینٹر کی جانب سے 10 ہزار شیلٹر کٹس اور 10 ہزار فوڈ پیکجز خیبرپختونخوا کے متاثرہ علاقوں کے لیے روانہ کر دیے گئے ہیں جنہیں نیشنل ڈیزاسٹر مینجمنٹ اتھارٹی (این ڈی ایم اے) کے ذریعے شفاف اور منظم انداز میں تقسیم کیا جائے گا۔

 یہ امدادی سامان اسلام آباد کے سپورٹس کمپلیکس میں ایک تقریب کے دوران روانہ کیا گیا جس میں سعودی عرب کے سفیر نواف بن سعید المالکی اور مشیر برائے الصوبائی رابطہ رانا ثناء اللہ نے خصوصی شرکت کی۔

 اس موقعے پر سعودی سفیر اور پاکستانی وزیر نے مشترکہ طور پر سعودی قیادت اور عوام کا شکریہ ادا کیا کہ وہ مشکل کی ہر گھڑی میں پاکستان کے ساتھ کھڑے رہتے ہیں۔

تقریب سے خطاب کرتے ہوئے سعودی عرب کے سفیر نواف بن سعید المالکی نے کہا کہ یہ امدادی سامان سعودی فرمانروا شاہ سلمان بن عبدالعزیز اور ولی عہد شہزادہ محمد بن سلمان کی خصوصی ہدایات پر روانہ کیا جا رہا ہے۔

انہوں نے کہا کہ حالیہ بارشوں اور کلاؤڈ برسٹ کے نتیجے میں پاکستان میں ہونے والی تباہ کاریوں پر سعودی قیادت کو گہرا افسوس ہے اور اس مشکل گھڑی میں سعودی عوام اپنے پاکستانی بھائیوں کے ساتھ کھڑے ہیں۔

’یہ امداد صرف ایک وقتی ریلیف نہیں بلکہ دونوں ممالک کے درمیان دیرینہ برادرانہ تعلقات کی عکاسی بھی ہے۔ سعودی عرب مستقبل میں بھی پاکستان کے ساتھ انسانی ہمدردی کے جذبے کے تحت تعاون جاری رکھے گا تاکہ متاثرہ خاندان جلد از جلد اپنی معمول کی زندگی کی طرف لوٹ سکیں۔‘

وزیراعظم کے مشیر رانا ثناء اللہ نے میڈیا سے گفتگو کرتے ہوئے سعودی قیادت کا شکریہ ادا کیا۔

 انہوں نے کہا کہ میں ’سعودی قیادت اور عوام کا شکر گزار ہوں کہ انہوں نے ہمیشہ ہر مشکل وقت میں پاکستان کا ساتھ دیا اور آج بھی وہ ہمارے ساتھ کھڑے ہیں۔ سعودی حکومت اور رائل فیملی کی جانب سے دیے گئے دس ہزار شیلٹر کٹس اور دس ہزار فوڈ پیکجز این ڈی ایم اے کے حوالے کر دیے گئے ہیں جو متاثرہ خاندانوں کے لیے ایک بڑی سہولت ثابت ہوں گے۔ ‘

رانا ثناء اللہ نے وضاحت کی کہ شیلٹر کٹس میں متاثرہ خاندانوں کے لیے مکمل رہائشی سامان شامل ہے جبکہ فوڈ کٹس میں روزمرہ ضرورت کی تمام اشیائے خورونوش موجود ہیں جو متاثرہ گھرانوں کے لیے وافر انتظام فراہم کریں گی۔

انہوں نے یقین دلایا کہ این ڈی ایم اے امدادی سامان کو شفافیت کے ساتھ مستحق خاندانوں تک پہنچائے گی اور کوئی کوتاہی برداشت نہیں کی جائے گی۔

رانا ثناء اللہ نے مزید بتایا کہ وزیراعظم شہباز شریف نے ذاتی طور پر خیبرپختونخوا کے متاثرہ علاقوں کا دورہ کیا اور امدادی سرگرمیوں کا جائزہ لیا۔ وزیراعظم نے متاثرین کو یہ یقین دلایا ہے کہ مکمل بحالی تک امداد کا سلسلہ جاری رہے گا۔ 

رانا ثناء اللہ نے مسلم لیگ ن کے قائد نواز شریف اور وزیراعظم شہباز شریف کی جانب سے سعودی قیادت اور عوام کا شکریہ ادا کرتے ہوئے کہا کہ پاکستان دوست ممالک کے تعاون کو ہمیشہ یاد رکھے گا اور یہ تعاون دونوں ممالک کے عوام کے درمیان محبت اور بھائی چارے کا عکاس ہے۔

کنگ سلمان ہیومینیٹرین ایڈ اینڈ ریلیف سینٹر کی طرف سے فراہم کردہ امدادی پیکجز میں خوراک اور رہائش کے مکمل انتظامات شامل ہیں۔ ہر فوڈ پیکج کا وزن پچانوے کلوگرام ہے، جس میں آٹا، چاول، دالیں، چینی، چائے اور دیگر اشیاء شامل ہیں۔ یہ پیکجز ستر ہزار سے زائد متاثرین کو ایک ماہ تک خوراک فراہم کرنے کے لیے کافی ہیں۔ شیلٹر کٹس میں خاندانوں کے لیے خیمے، بستر، کمبل اور دیگر بنیادی رہائشی ضروریات شامل ہیں تاکہ بے گھر افراد کو فوری سہارا مل سکے۔ امدادی سامان میں سولر پلیٹ اور بلب بھی شامل ہیں تاکہ متاثرہ علاقوں کے لوگوں عارضی طور پر بجلی کا متبادل میسر آ سکے۔ 

یہ امداد مجموعی طور پر 10 لاکھ امریکی ڈالر سے زائد مالیت کی ہے اور یہ براہِ راست خیبرپختونخوا کے ان علاقوں تک پہنچائی جائے گی جو حالیہ کلاؤڈ برسٹ اور بارشوں کے نتیجے میں سب سے زیادہ متاثر ہوئے ہیں۔

یہ پہلا موقع نہیں ہے کہ سعودی عرب نے پاکستان کی مشکل گھڑی میں بڑھ چڑھ کر مدد کی ہو۔ ماضی میں بھی زلزلوں، سیلابوں اور دیگر آفات میں سعودی عرب نے پاکستان کے عوام کو تنہا نہیں چھوڑا۔

کنگ سلمان ریلیف سینٹر پاکستان میں تعلیم، صحت، پینے کے صاف پانی اور دیگر ترقیاتی منصوبوں پر بھی کام کر رہا ہے جس سے لاکھوں پاکستانی فائدہ اٹھا رہے ہیں۔

سعودی سفیر نواف بن سعید المالکی نے کہا کہ سعودی عرب پاکستان کے ساتھ اپنے تعلقات کو نئی جہت پر لے جانا چاہتا ہے اور انسانی ہمدردی کی بنیاد پر جاری یہ تعاون مستقبل میں مزید مضبوط ہو گا۔