مملکت کے بیشتر علاقے رواں ہفتے کے آخر تک بارش کی زد میں رہیں گے

سعودی عرب میں موسمیات کے قومی مرکز نے کہا ہے کہ’ مملکت کے بیشترعلاقوں میں بارش کا سلسلہ رواں ہفتے کے آخر تک جاری رہنے کا امکان ہے۔‘

عاجل کے مطابق جازان، عسیر، الباحہ، مکہ، مدینہ اور نجران ریجن میں درمیانے درجے سے شدید بارش جبکہ ریاض قصیم، حائل اور الشرقیہ ریجن ہلکی سے درمیانے درجے کی بارش کی زد میں رہیں گے۔

ایکس اکاونٹ پر بیان میں جنوب مغربی اور مغربی پہاڑی علاقوں خاص طور پر جازان، عسیر، الباحہ اور مکہ  میں شدید بارش کا امکان ظاہر کیا گیا ہے۔ بعض مقامات پر گرد آلود ہوائیں بھی چلیں گی۔

مرکز نے شہریوں اور رہائشیوں سے کہا کہ’ وہ ویب سائٹ اور میڈیا پلیٹ فارمز کو فالو کریں اور حکام کی ہدایات اور گائیڈ لائنز پر عمل کریں۔‘

محکمہ شہری دفاع نے بھی شہریوں کو احتیاطی تدابیر کے ساتھ خود کو محفوظ مقامات تک محدود رکھنے کا مشورہ دیا ہے۔

’سیلاب سے متاثرہ مقامات، وادیوں اور نشیبی مقامات سے دور رہیں۔ ایسے مقامات پر جہاں بارش کا پانی جمع ہو تیراکی سے گریز کیا جائے‘۔