لائیو: پانی کی سطح بلند، اسلام آباد میں راول اور سملی ڈیم کے سپل ویز کھولنے کا فیصلہ

یہ پیج مزید اپڈیٹ نہیں کیا جا رہا

اہم نکات

چلاس میں ہیلی کاپٹر گر کر تباہ، چار افراد سوار تھے

پنجاب کے دریاؤں میں اونچے درجے کا سیلاب

بلوچستان میں موبائل انٹرنیٹ سروس 26 دنوں بعد بحال

ملک کے مختلف علاقوں میں مزید بارشوں کا امکان

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اسلام آباد میں راول اور سملی ڈیم کے سپل ویز کھولنے کا فیصلہ

اسلام آباد میں راول اور سملی ڈیم میں پانی کے سطح بلند ہونے پر ان کے سپل ویز کھولنے کا فیصلہ کیا گیا ہے۔

این ڈی ایم اے کی طرف سے جاری بیان کے مطابق راول ڈیم کے سپل ویز کل 2 ستمبر کو  صبح 7 بجے کھولیں جائیں گے، کیونکہ راول ڈیم کا لیول 1751.70 فٹ پر پہنچ چکا ہے۔

اسی طرح سی ڈی اے نے کہا ہے کہ سملی ڈیم میں پانی کی سطح 2314 فٹ تک پہنچ چکی ہے اور آج رات یکم ستمبر کو اس سپل وے کا ایک گیٹ دو فٹ تک کھولا جائے گا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اسلام آباد اور راولپنڈی میں موسلادھار بارش، نالہ لئی اور نشیبی علاقوں میں طغیانی کا خدشہ

اسلام آباد اور راولپنڈی میں موسلا دھار بارش کا سلسلہ جاری ہے جس کے بعد مختلف علاقوں میں سڑکوں پر بارش کا پانی جمع ہوگیا ہے۔

محکمہ موسمیات نے اسلام آباد اور راولپنڈی میں موسلادھار بارش کے بعد خبردار کیا ہے کہ نالہ لئی اور نشیبی علاقوں میں طعیانی کا خدشہ ہے۔

ان علاقوں اور آس پاس کے رہائشیوں کو کہا گیا ہے کہ وہ محتاط رہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چلاس میں فنی خرابی کے باعث ہیلی کاپٹر گر کر تباہ، پائلٹس سمیت 5 ہلاک

پاکستانی فوج کے شعبہ تعلقات عامہ (آئی ایس پی آر) کے مطابق منگل کی صبح تقریباً دس بجے آرمی ایوی ایشن کا ایم آئی-17 ہیلی کاپٹر ضلع دیامر کے علاقے ہُڈور گاؤں کے قریب گر کر تباہ ہو گیا، جو تھکداس کینٹونمنٹ سے تقریباً 12 کلومیٹر کے فاصلے پر واقع ہے۔

ہیلی کاپٹر معمول کی تربیتی پرواز پر تھا جب اسے فنی خرابی پیش آئی اور وہ گر کر تباہ ہوا۔ حادثے میں سوار تمام عملہ ہلاک ہو گیا جن کی شناخت اس طرح کی گئی ہے: میجر عاطف (پائلٹ ان کمانڈ)، میجر فیصل (کو پائلٹ)، نائب صوبیدار مقبول (فلائٹ انجینئر)، حوالدار جہانگیر (کرو چیف) اور نائیک عامر (کرو چیف)۔

آئی ایس پی آر کے مطابق آرمی ایوی ایشن کے تربیتی مشنز معمول کا حصہ ہیں جن کا مقصد آپریشنل تیاری کو برقرار رکھنا ہے تاکہ مختلف ذمہ داریوں جیسے آپریشنل سپورٹ، انسانی ہمدردی کی امداد اور قدرتی آفات میں ریلیف فراہم کیا جا سکے۔

بیان میں کہا گیا کہ پاک فوج ہر پہلو میں تیاری کو یقینی بنانے کے عزم پر قائم ہے۔

وزیراعلٰی گلگت بلتستان گلبر خان نے اس افسوسناک واقعے پر افسوس کا اظہار کیا ہے اور کہا ہے کہ ’پاکستان فوج نے ہر آزمائش نے میں جانوں کا نذرانہ پیش کیا۔‘

ترجمان جی بی حکومت فیض اللہ فراق کے مطابق حادثہ اس وقت پیش آیا جب ہیلی کاپٹر لینڈنگ کی کوشش کر رہا تھا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

’ہر ممکن تعاون کے لیے تیار ہیں‘، وزیراعظم کا افغانستان سے اظہار افسوس

پاکستان کے وزیراعطم شہباز شریف نے افغانستان میں زلزلے سے جانی نقصان پر افسوس کا اظہار کیا ہے۔

پیر کو انہوں نے ایکس پر ایک بیان میں لکھا کہ افغانستان میں زلزلے سے سینکڑوں کی تعداد میں افراد کی ہلاکت اور کئی دیہات تباہ ہونے کی اطلاعات ہیں، جس پر میں اپنی، حکومت اور پاکستان کے عوام کی جانب سے دکھ کا اظہار کرتا ہوں۔

ان کا مزید کہنا تھا کہ ’میں غمزدہ خاندانوں سے تعزیت کرتا ہوں، ہم دکھ کی اس گھڑی میں اپنے افغان بہن بھائیوں کے ساتھ کھڑے ہیں اور ہر ممکن تعاون کے لیے تیار ہیں۔‘

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

پنجاب میں سیلاب کی صورتحال سنگین، دریاؤں میں اونچے درجے کا سیلاب ریکارڈ

رائے شاہنواز اردو نیوز، لاہور

قدرتی آفات سے نمٹنے کے صوبائی ادارے پی ڈی ایم اے نے کہا ہے کہ پنجاب میں سیلاب کی صورتحال سنگین ہے اور دریاؤں میں اونچے درجے کا سیلاب ریکارڈ کیا جا رہا ہے۔

پی ڈی ایم اے کے مطابق دریائے چناب میں پانی کا ایک بڑا ریلا تریموں ہیڈ کی طرف بڑھ رہا ہے۔ اسی طرح دریائے راوی میں بلوکی کے مقام پر انتہائی اونچے درجے کا سیلاب ہے۔

پنجاب پولیس نے ایک بیان میں کہا ہے کہ اب تک لاہور سمیت مختلف اضلاع سے دو لاکھ 22 ہزار سے زائد افراد کو محفوظ مقامات پر منتقل کیا جا چکا ہے۔ پولیس نے متاثرہ علاقوں سے دو لاکھ 97 ہزار سے زائد مویشی بھی نکالے۔

محکمہ تعمیرات و مواصلات کے مطابق صوبے بھر میں 510 شاہراہوں کے سیکشن اور 64 پل سیلاب اور بارشوں سے متاثر ہوئے ہیں جن میں سے 50 سے زائد سڑکیں اور 40 پل بحال کر دیے گئے ہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سندھ میں ’سوپر فلڈ‘ کے پیش نظر ہائی الرٹ

زین علی اردو نیوز، کراچی

حکام نے صوبہ سندھ میں دو سے تین ستمبر کے دوران ممکنہ ’سپر فلڈ‘ کے پیش نظر ہائی الرٹ جاری کر دیا ہے۔

گڈو، سکھر اور کوٹری بیراج پر پانی کے بہاؤ میں مسلسل اضافہ ہو رہا ہے جس سے دو لاکھ 73 ہزار خاندان اور 1600 سے زیادہ دیہات متاثر ہونے کا خدشہ ہے۔  

وزیراعلیٰ مراد علی شاہ نے تمام اضلاع کی انتظامیہ کو متحرک ہونے کی ہدایت کی ہے۔

پی ڈی ایم اے نے ممکنہ سیلاب کے پیش نظر حساس قرار دیے گئے اضلاع سکھر، لاڑکانہ اور شکارپور کے لیے امدادی سامان روانہ کر دیا ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بلوچستان میں موبائل انٹرنیٹ سروس 26 دنوں بعد بحال

زین الدین احمد، اردو نیوز کوئٹہ

بلوچستان میں موبائل انٹرنیٹ سروس 26 دنوں بعد بحال کر دی گئی ہے۔ صوبے کے تمام 36 اضلاع میں 6 اگست سے تھری جی اور فور جی سروسز سکیورٹی وجوہات کی بنا پر بند کی گئی تھی۔

بلوچستان ہائی کورٹ کے حکم پر دو ہفتوں بعد کوئٹہ سمیت چار اضلاع میں انٹرنیٹ بحال کیا گیا تھا لیکن باقی 32 اضلاع میں موبائل ڈیٹا مسلسل معطل رہا۔ 

انٹرنیٹ کی طویل بندش نے عام صارفین سے لے کر طلبہ، فری لانسرز، آن لائن کاروبار کرنے والی خواتین اور فوڈ ڈلیوری رائیڈرز تک سب کو شدید متاثر کیا۔

پیر اور اتوار کی درمیانی شب 12 بجے کے بعد موبائل فونز پر تھری جی اور فور جی سگنلز آنے پر صارفین نے سوشل میڈیا پر خوشی کا اظہار کیا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آج سے تین ستمبر تک مزید بارشوں کی پیش گوئی

اسلام آباد اور پنجاب کے مختلف اضلاع میں آج سے تین ستمبر تک مزید بارشوں کی پیش گوئی کی گئی ہے جبکہ این ڈی ایم اے نے الرٹ جاری کرتے ہوئے کہا خبردار کیا ہے کہ اس سے سیلاب زدہ علاقوں میں مشکلات بڑھ سکتی ہیں۔

راولپنڈی اور اسلام آباد کے علاوہ قریبی علاقوں میں بھی پیر کی صبح کے وقت بارش ہوئی جبکہ اب بھی مطلع ابرآلود ہے۔

محکمہ موسمیات کی ویب سائٹ پر دی گئی معلومات کے مطابق خلیج بنگال اور بحیرہ عرب سے مون سون ہوائیں ملک میں داخل ہو رہی ہیں جو بارشوں کا باعث بنیں گی۔

آج پنجاب، کشمیر، اسلام آباد اور خیبر پختونخوا میں تیز ہوائیں چلنے اور گرج چمک کے ساتھ بارش ہو گی جبکہ شمال مشرقی پنجاب، مشرقی پنجاب، بالائی خیبر پختونخوا اور کشمیر میں کچھ مقامات پر موسلادھار بارش کا امکان ہے۔ اسی طرح مشرقی بلوچستان، جنوب مشرقی سندھ اور گلگت بلتستان میں بھی تیز ہوائیں اور بارش متوقع ہے۔