’پاکستان برادر ملک قطر کے ساتھ کھڑا ہے‘، وزیراعظم شہباز شریف کی امیرِ قطر سے ملاقات

پاکستان کے وزیراعظم شہباز شریف نے قطر کے امیر شیخ تمیم بن حمد الثانی سے ملاقات میں اُن کو اسرائیل کے حملے کے بعد اپنے ملک کی مکمل حمایت کا یقین دلایا ہے۔

جمعرات کو ایک روزہ دورے کے دوران دوحہ میں قطر کے امیر سے ملاقات میں پاکستان کے وزیراعظم نے اسرائیلی حملے کی مذمت کی۔

اسلام آباد میں پرائم منسٹر آفس سے جاری بیان کے مطابق وزیراعظم نے کہا کہ اسرائیل کا حملہ قطر کی خودمختاری اور علاقائی سالمیت کی کھلم کھلا خلاف ورزی ہے۔ ’پاکستان کی قیادت اور عوام کو برادر ملک قطر کے خلاف حملے پر سخت تشویش ہے جو بین الاقوامی قوانین کے منافی کارروائی تھی۔‘

شہباز شریف نے کہا کہ ’دونوں ملک ایک دوسرے کے ساتھ کھڑے ہیں۔ پاکستان اس مشکل وقت میں امیر قطر، شاہی خاندان اور قطر کے برادر عوام کے ساتھ کندھے سے کندھا ملا کر کھڑا ہے۔‘

بیان کے مطابق ’وزیراعظم نے اسرائیل کے اس وحشیانہ اور گھناؤنے حملے میں قیمتی جانوں کے ضیاع پر گہری ہمدردی کا اظہار بھی کیا۔‘

بیان کے مطابق وزیراعظم نے کہا کہ ’مشرق وسطیٰ میں اسرائیل کی ڈھٹائی سے جاری جارحیت کو روکنا ہوگا اور امت کو اسرائیلی اشتعال انگیزیوں کے مقابلے میں اپنی صفوں میں اتحاد کی ضرورت ہے۔‘

وزیراعظم نے غزہ میں امن کے قیام کے لیے قطر کے ذمہ دارانہ و تعمیری ثالثی کے کردار کو سراہا اور اس بات پر زور دیا کہ اسرائیلی جارحیت کی ایسی کارروائیوں کا مقصد واضح طور پر علاقائی استحکام کو نقصان پہنچانا ہے اور اس سے جاری سفارتی اور انسانی کوششوں کو خطرے سے دوچار کرنا ہے۔

بیان کے مطابق نائب وزیرِاعظم و وزیرِ خارجہ اسحاق ڈار، وزیرِ دفاع خواجہ آصف، وزیرِ اطلاعات و نشریات عطاء اللہ تارڑ اور معاون خصوصی طارق فاطمی وزیرِاعظم کے وفد میں شامل تھے۔

پاکستانی وفد نے وزیراعظم کی سربراہی اسرائیلی جارحیت پر امیر قطر شیخ تمیم بن حمد الثانی، قطری شاہی خاندان اور قطری عوام سے اظہار یکجہتی کے لیے ایک روزہ دورہ کیا۔