مکہ مکرمہ کی تاریخ و ثقافت کو محفوظ کرنے کا منصوبہ

مکہ مکرمہ کی تاریخ و ثقافت کے تحفظ  کے لیے مکہ سٹی اور حرمینِ شریفین رائل کمیشن نے جامع حکمتِ عملی کے تحت ایک بڑی تبدیلی کا آغاز کر دیا ہے۔

عرب نیوز کے مطابق نئے منصوبے کے تحت مکہ مکرمہ  کے مالا مال تاریخی ورثے کو محفوظ کیا جائے گا اور اسے جدید دور کے تقاضوں سے ہم آہنگ کر کے لوگوں کے سامنے لایا جائے گا جس سے شہرِ مکہ کی گہری مذہبی اور ثقافتی اہمیت اجاگر ہوگی اور زائرین کے لیے بہترین تجربہ ثابت ہو۔

 انیشی ٹِیو کے تحت اٹھانوے اہم سائٹس کی شناخت کی گئی ہے جن میں سے 64 کو ترجیحی بنیادوں پر بہتر بنایا جائے گی لیکن اس کے لیے جس معیار کو سامنے رکھا جائے گا اس میں سائٹ کی مذہبی اور ثقافتی اہمیت، اِستناد، سائٹ کا بے مثال ہونا اور فاصلے کے لحاظ سے مسجد الحرام سے قربت ہیں۔

اہم سنگ مِیل میں سنہ 2023 میں ’حرا کلچرل ڈسٹرکٹ‘ اور ’ریوِی لیشن ایگزیبِش‘ کے افتتاح کے علاوہ جبل الرحمہ سائٹ کی بحالی کئی گئی اور زائرین کے لیے خدمات کی بہتری اور انفراسٹرکچر کو اپ گریڈ کیا گیا۔

سنہ 2024 کے آغاز میں ’عین زبیدہ‘ (نہر زبیدہ) سائٹ کو ’کدانا‘ ڈیویلپمنٹ کمپنی کے اشتراک کے ساتھ تعمیر کیا گیا اور اس میں ایک کلو میٹر طویل ہائیکنگ کدانہ ٹریل، تفریحی ایریا اور ملٹی میڈیا کی نمائش بھی کی گئی۔

اس برس پروجیکیٹس کو مزید وسعت دیتے ہوئے مسجد ’البیعۃ‘ کو بحال کیا گیا، عوام میں مقبول فوڈ سٹریٹ وجود میں آئی اور حرمین شریفین کے فنِ تعمیر کی نمائش کو مزید بہتر بنایا گیا۔

دیگر انیشی ٹِیوز میں، جامعہ ام القری میں اسلامی مسودے کے میوزیم اور معلومات بڑھانے والے دوروں کا آغاز کیا گیا۔

ایک اہم پیشرفت کے تحت اسی دوران پیغمبرِ اسلام کی سوانح اور اسلامی تہذیب کے بین الاقوامی میوزیم کا افتتاح کیا گیا جس میں رسولِ اکرم کی حیاتِ مبارکہ اور اسلامی تہذیب کی وراثت پر مبنی کئی زبانوں پر مشتمل دستاویزات اور اشیا کی انٹر ایکٹیو نمائش کا اہتمام کیا گیا۔

تعمیر و ترقی کے دیگر اقدامات میں مسجدالحرام میں کتب خانے کی افادیت میں اضافہ جس میں پہلے سے 350000 کتابیں اور مسودات موجود ہیں اور شہر میں پبلک پارکس اور پیدل چلنے والوں کے لیے راستوں کو استعمال کے لیے تیار کرنا شامل ہے۔

کمیشن کے سربراہ صالح الرشید نے بتایاکہ یہ کوششیں اس مربوط وژن کا حصہ ہیں جس کے تحت مکہ کی تاریخی اور ثقافتی سائٹس کو سنبھالنا اور سہارا دینا ہے۔

انھوں نے کہا کہ تعمیر و ترقی کے کام کو کئی زبانوں پر مشتمل مواد کے ذریعے پیش کرنا اور اسے ایک وسیع ثقافتی منزلِ مقصود سے جوڑنے سے مکہ کی مذہبی، تاریخی اور ثقافتی شناخت بڑھے گی اور دیکھنے والوں کے تجربے کو بہتر بنائے گی۔