فواد خان کی فلم ’عبیر گلال‘ کو انڈیا میں ریلیز کرنے کی اجازت نہیں دی: انڈین حکومت

پاکستان کے مایہ ناز اداکار فواد خان اور بالی وڈ کی خوبرو اداکارہ وانی کپور کی نئی آنے والی فلم ’عبیر گلال‘ رواں برس 22 اپریل کو انڈیا کے زیرِانتظام کشمیر میں دہشت گردی کے ایک واقعے کے بعد سے التوا کا شکار ہے۔

ہندوستان ٹائمز کے مطابق اس رومانوی فلم کو نو مئی کو انڈین سنیماؤں کی زینت بننا تھی لیکن یہ ریلیز نہ ہو سکی۔

گذشتہ کئی دنوں سے یہ رپورٹس سامنے آ رہی تھیں کہ ’عبیر گلال‘ 26 ستمبر کو انڈیا میں ریلیز ہو گی۔ لیکن پریس انفارمیشن بیورو (پی آئی بی) اب ان تمام دعووں کو مسترد کرتے ہوئے کہا ہے کہ یہ فلم انڈیا میں ریلیز نہیں ہو گی۔

پی آئی بی نے سماجی رابطوں کی یوب سائٹ ایکس پر اپنے آفیشل اکاؤنٹ سے جاری کردہ ایک بیان میں کہا کہ ’کئی میڈیا اداروں کی جانب سے دعویٰ کیا جا رہا ہے کہ فواد خان اور وانی کپور کی فلم ’عبیر گلال‘ 26 ستمبر 2025 کو انڈین سنیما گھروں میں ریلیز کی جائے گی۔‘

’یہ دعویٰ جھوٹا ہے، اس فلم کے حوالے سے کوئی کلیئرنس نہیں دی گئی۔‘

فواد خان نے پہلے بھی مختلف انڈین فلموں میں کام کیا ہے جن مں ’خوبصورت‘ اور ’کپور اینڈ سنز‘ شامل ہیں۔ ان فلموں میں پرفارمنس کی وجہ سے فواد خان نے انڈیا میں بھی بہت سے فینز بنائے ہیں۔

’عبیر گلال‘ کو آرتی ایس بغدی نے ڈائریکٹ کیا ہے۔ سنہ 2016 میں انڈیا اور پاکستان کے بیچ تنازعات کہ وجہ سے پاکستانی فنکاروں کے انڈین فلموں میں کام کرنے پر غیرسرکاری پابندی لگ گئی تھی۔