سعودی وزیر خارجہ اقوام متحدہ کی جنرل اسمبلی اجلاس میں شرکت کےلیے نیویارک پہنچ گئے

سعودی وزیر خارجہ شہزادہ فیصل بن فرحان سنیچر کو اقوام متحدہ کی جنرل اسمبلی کے 80 ویں اجلاس میں شرکت کےلیے نیویارک پہنچ گئے، وہ سعودی وفد کی قیادت کریں گے۔

ایس پی اے کے مطابق وزارت خارجہ کی جانب سے جاری بیان میں کہا گیا کہ سعودی وفد میں امریکہ میں سفیر شہزادی ریما بنت بندر، وزیر مملکت برائے خارجہ اور موسمیاتی امور کے ایلچی عادل الجبیر، وزیر اقصادیات فیصل بن فاضل الابراہیم، سعودی امدادی ایجنسی کے سربراہ ڈاکٹر عبداللہ الربیعہ، نائب وزیر برائے بین الاقوامی کثیر الجہتی امور عبدالرحمن الرسی اور اقوام متحدہ میں سعودی عرب کے مستقل مندوب عبدالعزیز الواصل شامل ہیں۔

بیان میں کہا گیا کہ سعودی عرب جنرل اسمبلی کے اجلاس کے موقع پر متعدد انیشیٹیوز اور اجلاسوں کی میزبانی کرے گا جن کا مقصد علاقائی اور بین الاقوامی سلامتی اور استحکام کو مضبوط بنانا، سفارتی، انسانی اور ترقیاتی کوششوں کو آگے بڑھانا ہے۔

سعودی عرب مسئلہ فلسطین کے پرامن اور دو ریاستی حل کےلیے اعلی سطح کی بین الاقوامی سمٹ کی میزبانی بھی کرے گا۔