گورنر عسیر کی عطیہ خون مہم ’عسیرتقتدی‘ کا آغاز

گورنر عسیر شہزادہ ترکی بن طلال بن عبدالعزیز نے عطیہ خون مہم کا آغاز ’عسیرتقتدی‘ کے عنوان سے کردیا ہے۔ مہم کا مقصد زندگیوں کو بچانا اور مریضوں کو بروقت خون کی فراہمی کو ممکن بنانا ہے۔

سبق نیوز کے مطابق ’عسیر تقتدی‘ (عسیر پیروی کرتا ہے) کے عنوان سے شروع کی جانے والی مہم براہ راست گورنریٹ کی زیرنگرانی ہوگی جو ولی عہد شہزادہ محمد بن سلمان بن عبدالعزیز آل سعود کے اقدام کی پیروی کرتے ہوئے کی گئی۔

اس موقع پر گورنر عسیر نے اس بات پرزور دیا کہ عطیہ خون مہم قوم کے لوگوں میں یکجہتی، ہمدردی اور جذبہ ایثار و اخوات کو مستحکم کرنے میں اہم ثابت ہوگی۔

ان کا مزید کہنا تھا کہ خون کا عطیہ دینا ایک قومی فریضہ ہے جس کے ذریعے زندگیاں بچانے اور صحت کے شعبے سے  تعاون میں اپنا حصہ شامل کیا جاسکتا ہے۔

مملکت کے ویژن 2030 کے اہداف میں رضاکارانہ عطیہ خون کا تناسب 100 فیصد تک لے جانا ہے اس حوالے سے مختلف علاقوں میں عطیہ خون مہم شربوع کی گئی ہے تاکہ معاشرے کو اس کی اہمیت و افادیت سے آگاہ کیا جائے۔

خیال رہے ولی عہد مملکت و وزیر اعظم شہزادہ محمد بن سلمان بن عبدالعزیز آل سعود نے گزشتہ ماہ خون کا عطیہ دے کر اس مہم کا آغاز کیا تھا ۔

اس ضمن میں وزارتِ صحت کا کہنا تھا کہ گزشتہ برس مملکت کی سطح پر 8 لاکھ سے زائد افراد نے رضاکارانہ طورپر خون کا عطیہ دیا۔