سلطان جوہر ہاکی کپ، پہلے میچ میں پاکستان نے ملائیشیا کو شکست دے دی

سلطان جوہر ہاکی کپ کے ایک میچ میں پاکستان نے ملائیشیا کو دو کے مقابلے میں سات گول سے شکست دے دی ہے۔

سنیچر کو ملائیشیا کے شہر جوہر بارو میں کھیلے گئے میچ میں پاکستان کی جانب سے پہلا گول سفیان خان نے پہلے کوارٹر کے تیسرے منٹ میں سکور کیا۔

پاکستان کی جانب سے دوسرا گول بھی سفیان خان نے دوسرے کوارٹر کے 21ویں منٹ میں جبکہ تیسرا گول کپتان حنان شاہد نے 30ویں منٹ میں سکور کیا۔

چوتھا گول ندیم خان نے 32ویں منٹ میں سکور کیا جبکہ پانچواں گول 34ویں منٹ میں سفیان خان نے کیا۔

پاکستان کی جانب سے چھٹا گول ندیم خان نے کھیل کے 44ویں منٹ میں کیا جبکہ ساتواں گول حمزہ فیاض نے 52 ویں منٹ میں سکور کیا۔

ملائیشیا کی گول کی جانب سے پہلا گول کھیل کے 20ویں منٹ میں عبد عمار نے سکور کیا جبکہ دوسرا گول 35ویں منٹ میں کامران الدین نے کیا۔

سنیچر 11 اکتوبر کو شروع ہونے والے اس ٹورنامنٹ میں کُل چھ ٹیمیں شریک ہیں۔ دیگر ٹیموں میں انڈیا، آسٹریلیا، نیوزی لینڈ اور برطانیہ شامل ہیں۔

سلطان جوہر ہاکی کپ کے پہلے میچ میں انڈیا نے برطانیہ کی ٹیم کو دو کے مقابلے میں تین گول سے شکست دی تھی۔

پاکستان کی ٹیم اپنا اگلا میچ اتوار کو برطانیہ کے خلاف کھیلے گی جبکہ روایتی حریف انڈیا کے ساتھ پاکستان کا مقابلہ منگل کو ہوگا۔

چھ ملکی ہاکی ٹورنامنٹ میں شریک ہر ٹیم پانچ میچز کھیلے گی۔

سلطان جوہر ہاکی کپ کا فائنل 18 اکتوبر کو ملائیشیا کے شہر جوہر بارو کے سٹیڈیم میں کھیلا جائے گا۔