المسجد الحرام میں دروس کے حلقوں کے مقامات کا تعین

حرمین شریفین انتظامیہ نے مسجد الحرام میں منعقد ہونے والے علمی دروس کے حلقوں کے مقامات کی تفصیلات جاری کی ہیں۔

سبق ویب سائٹ کے مطابق ان حلقوں میں سربرآوردہ علما، ائمہ حرمین اور مستند مدرسین دروس پیش کریں گے۔

یہ دروس زائرینِ مسجد الحرام کی شرعی رہنمائی اور دینی فہم کو مضبوط بنانے کے لیے پیش کیے جاتے ہیں۔

یہاں فقہ، عقیدہ اور مناسک جیسے بنیادی دینی موضوعات پر مشتمل مختلف دروس دیئے جائیں گے۔

انتظامیہ نے کہا ہے کہ ’پہلا حلقہ صحن المطاف میں ائمہ کے لیے مخصوص کرسی کے قریب، باب اسماعیل کی سمت ہوگا‘۔

’گراؤنڈ فلور میں دو مقامات پر، باب نمبر 89 اور 90 کے مقابل دو حلقے ہوں گے‘۔

’پہلی منزل میں توسیعی ابواب اور سیڑھیوں کے سامنے باب نمبر : 64، 74، 84 اور 91 میں متعدد حلقے ہوں گے‘۔

’اسی طرح شمالی توسیع میں باب نمبر 123 کے نزدیک ایک حلقہ ہوگا‘۔

مسجد الحرام کی چھت پر کرسی نمبر 15 پر، سیڑھی 91 کے سامنے ایک حلقہ ہوگا‘۔

حرمین انتظامیہ نے زائرین سے اپیل کی ہے کہ وہ ان دروس میں شرکت کر کے دینی معلومات میں اضافہ اور عبادات و مناسک کی صحیح ادائیگی میں رہنمائی حاصل کریں۔

مزید یہ کہ یہ پروگرام حرمین شریفین میں دینی خدمات کے سلسلے کی ایک اہم کڑی ہیں جو اعتدال، فہمِ دین اور وسطیت کے اصولوں کی ترویج میں مؤثر کردار ادا کرتے ہیں۔