وزیراعلٰی خیبر پختونخوا سہیل آفریدی نے 13 رکنی کابینہ کا اعلان کردیا

وزیراعلٰی خیبر پختونخوا سہیل آفریدی نے 13 رکنی کابینہ کا اعلان کردیا ہے۔ کابینہ میں 10 وزرا، دو مشیر اور ایک معاونِ خصوصی کو شامل کیا گیا ہے۔
وزیراعلٰی کے فوکل پرسن یار محمد خان نیازی کے مطابق صوبائی کابینہ میں پشاور سے مینا خان آفریدی، ہری پور سے ارشد ایوب خان اور سوات سے ڈاکٹر امجد کو شامل کیا گیا ہے۔

کوہاٹ سے آفتاب عالم خان، چارسدہ سے فضل شکور خان، نوشہرہ سے خلیق الرحمان، بونیر سے ریاض خان اور بونیر سے ہی سید فخر جہاں بھی خیبر پختونخوا کابینہ کا حصہ ہوں گے۔
سابق سپیکر قومی اسمبلی اور پی ٹی آئی کے مرکزی رہنما اسد قیصر کے بھائی عاقب اللہ خان اور رکن قومی اسمبلی شہرام ترکئی کے بھائی فیصل خان ترکئی کو بھی کابینہ کا حصہ بنایا گیا ہے۔
یاد رہے کہ عاقب اللہ خان اور فیصل خان ترکئی نے سابق وزیراعلٰی علی امین گنڈاپور کی کابینہ سے استعفیٰ دے دیا تھا۔
اس کے علاوہ صوبائی کابینہ میں سابق مشیر خزانہ مزمل اسلم کو دوبارہ شامل کیا گیا ہے۔ بٹگرام سے تاج محمد ترندہ کو بھی مشیر کا عہدہ دیا گیا ہے۔
اسی طرح کوہاٹ سے شفیع جان معاون خصوصی کی حیثیت سے خیبر پختونخوا کی کابینہ میں شامل کیے گئے ہیں۔