سعودی خبررساں ایجنسی ’ایس پی اے‘ کے مطابق ایوان صنعت کی جانب سے کیے جانے والے سروے میں مدینہ ریجن آنے والے73.7 فیصد زائرین نے اس خواہش کا اظہار کیا کہ ان کی اولین منزل مدینہ منورہ کا مقدس شہر ہے جہاں نبی آخر الزمان ﷺ کا روضہ مبارکہ، مسجد نبوی اور اسلامی تاریخی ورثہ موجود ہے۔
رپورٹ میں مزید کہا گیا ہے کہ مدینہ منورہ عالمی سطح پر 100 بہترین مقامات میں شامل ہےجبکہ ٹورآزم پرفارمینس انڈیکس میں عالمی سطح پر اس شہر کا ساتویں نمبر ہے ۔
سروے میں مزید بتایا گیا کہ ریجن آنے والے سیاحوں میں 47.2 فیصد نے العلا کے بارے میں بھی دلچسپی کا اظہار کیا جہاں تاریخی مقامات کے علاوہ ثقافتی سرگرمیوں کا بھی اہتمام کیا جاتا ہے ۔
14.1 فیصد نے ینبع کے ساحلی علاقے کو دیکھنے اور فیملی تفریح کے لیے بہترین مقام قرار دیا۔
مدینہ منورہ آنے والے ایک زائر کا کہنا تھا کہ ’اس پرنور شہر کےحوالے سے قلبی کیفیت کو لفظوں میں بیان کرنا مشکل ہے۔‘
’ شہرِ مقدس کے بارے میں احساسات کو الفاظ ڈھالنا ممکن نہیں‘ (فوٹو، ایس پی اے)
چیمبر آف کامرس کی رپورٹ میں مدینہ منورہ کی ترقیاتی اتھارٹی کی جانب سے ریجن کی ترقی کےلیے کیے جانے والے منصوبوں کو بھی سراہا گیا جن کا مقصد سیاحوں کے علاوہ یہاں کے شہریوں اور مقیمین کے لیے بھی سہولیات کی فراہمی کو یقینی بنانا ہے۔
