تیسرا ون ڈے: جنوبی افریقہ کو7 وکٹوں سے شکست، پاکستان نے سیریز جیت لی

پاکستان اور جنوبی افریقہ کے درمیان کھیلی گئی تین ایک روزہ میچوں کی سیریز کے آخری اور فیصلہ کُن میچ میں گرین شرٹس نے پروٹیز کو باآسانی سات وکٹوں سے شکست دے دی ہے۔ 

سنیچر کو فیصل آباد کے اقبال سٹیڈیم میں پاکستان نے جیت کے لیے 144 رنز کا ہدف تین وکٹوں کے نقصان پر 26ویں اوور کی پہلی گیند پر حاصل کیا۔

جنوبی افریقہ کی اننگز

جنوبی افریقہ کے کپتان نے ٹاس جیت کر پہلے بیٹنگ کا فیصلہ کیا۔

ابتدائی طور پر یہ فیصلہ درست نظر آیا جب مہمان ٹیم کے اوپنرز نے اچھا آغاز فراہم کیا مگر پھر یکے بعد وکٹیں گر گئیں۔

پاکستانی بولرز کی شاندار کارکردگی کا اندازہ اس بات سے کیا جا سکتا ہے کہ جنوبی افریقہ کی پہلی وکٹ 72 کے مجموعی سکور پر گری اور اس کے بعد پوری ٹیم 143 رنز پر آؤٹ ہو گئی۔

پچھلے میچ میں سینچری سکور کرنے والے کوئنٹن ڈی کاک نے آج نصف سینچری سکور کی۔ وہ 53 رنز بنا کر آؤٹ ہوئے۔ اوپنر پریٹوریس نے 39 رنز سکور کیے۔ دونوں اوپنرز کے آؤٹ ہونے کے بعد کوئی کھلاڑی کریز پر نہ ٹھہر سکا۔ اور پوری ٹیم 38 ویں اوور میں آؤٹ ہو گئی۔

پاکستان کی جانب سے سپنر ابرار احمد نے چار کھلاڑیوں کو پویلین بھیجا۔ انہوں نے دس اوورز کیے، ایک میڈن رہا اور 27 رنز دیے۔

محمد نواز نے 9 اوورز میں 31 رنز دے کر دو وکٹیں حاصل کیں۔ شاہین آفریدی اور سلمان آغاز نے 18، 18 رنز دے کر دو، دو وکٹیں حاصل کیں۔

پاکستان کی اننگز

جواب میں پاکستانی اوپنرز نے اننگز کا آغاز کیا تو فخر زمان ایک بار پھر ناکام رہے۔ انہوں نے دو گیندیں کھیلیں اور بغیر کوئی رنز بنائے پویلین لوٹ گئے۔ ان کو برگر نے کلین بولڈ کیا۔

پاکستان کے دوسرے آؤٹ ہونے والے کھلاڑی بابر اعظم تھے جنہوں نے 27 رنز سکور کیے۔ صائم ایوب 77 رنز بنا کر آؤٹ ہوئے۔ اُن کی اننگز میں 11 چوکے ایک چھکا شامل تھا۔

محمد رضوان نے 36 رنز سکور کیے اور ناٹ آؤٹ رہے۔