حج 2026 کے انتظامات، سعودی عرب اور پاکستان کے درمیان معاہدہ طے پا گیا

سعودی عرب اور پاکستان کے درمیان حج 2026 کے انتظامات اور سہولیات سے متعلق باضابطہ معاہدہ طے پا گیا ہے۔

وزارت مذہبی امور نے جاری بیان میں کہا سعودی نائب وزیر حج و عمرہ ڈاکٹر عبد الفتاح بن سلیمان المشاط اور وفاقی سیکریٹری مذہبی امور ڈاکٹر سید عطا الرحمن نے سنیچر کو جدہ میں حج معاہدے پر دستخط کیے۔

دستخط کی تقریب میں پاکستان میں تعینات سعودی عرب کے سفیر نواف بن سعید المالکی، ڈی جی حج جدہ عبدالوہاب سومرو، ڈائریکٹر حج مکہ مکرمہ عزیز اللہ خان، ڈائریکٹر حج مدینہ منورہ ضیاءالرحمن، ڈپٹی سیکرٹری حج پالیسی چوہدری کاشف حسین اور پرائیویٹ حج کمپنیوں کی نمائندہ تنظیم (ہوپ) کے عہدے داران شریک ہوئے۔

وفاقی سیکریٹری مذہبی امور ڈاکٹر سید عطاء الرحمن نے حجاج کی مہمان نوازی اور سہولیات کی فراہمی کے لیے سعودی حکومت کی بہترین کاوشوں پر شکریہ ادا کیا۔

انہوں نے کہا کہ گزشتہ برس کی طرح اس سال بھی پاکستانی حجاج کرام کو اعلیٰ معیار کی سہولیات فراہم کی جائیں گی۔

انہوں نے مزید کہا کہ وزارتِ مذہبی امور سعودی حکومت کی ہدایات کے مطابق سرکاری اور پرائیویٹ حج سکیموں کے انتظامات کو بروقت اور مؤثر طریقے سے مکمل کرنے کے لیے پرعزم ہے۔