27ویں آئینی ترمیم پر قومی اسمبلی میں ووٹنگ جاری، اپوزیشن کا احتجاج

وفاقی وزیر قانون و انصاف اعظم نذیر تارڑ نے قومی اسمبلی میں 27ویں آئینی ترمیم کی تحریک پیش کر دی ہے جس پر ووٹنگ جاری ہے۔

بدھ کو قومی اسمبلی میں تحریک پیش کرتے ہوئے وزیر قانون و انصاف نے کہا کہ سینیٹ آف پاکستان نے آئینی ترمیم کی منظوری دو تہائی اکثریت سے دے دی۔ آئین میں ترامیم ایک ارتقائی عمل ہے۔

انہوں نے کہا کہ چیف جسٹس آف پاکستان کے عہدے کے بارے میں ابہام موجود تھا۔ سینیٹ سے منظور شدہ بل میں مناسب ترامیم متعارف کرائی جا رہی ہے۔

’چیف جسٹس سپریم کورٹ ہی چیف جسٹس آف پاکستان رہیں گے۔ آرٹیکل 6 میں سنگین غداری کے بارے میں ترمیم کی جا رہی ہے۔ کوئی عدالت بھی آئین شکنی کی توثیق نہیں کر سکتی۔‘

وفاقی وزیر قانون و انصاف کا کہنا تھا کہ ’اب وفاقی آئینی عدالت کو بھی اس فہرست میں شامل کر لیا گیا ہے۔ وفاقی آئینی عدالت بھی آئین شکنی کی توثیق نہیں کر سکتی۔‘