پاکستان کی پارلیمان کے ایوان بالا سینیٹ میں 27 ویں آئینی ترمیمی بل کی منظوری کے لیے حکومت کو اپوزیشن کی جماعتوں پی ٹی آئی اور جمیعت علمائے اسلام سے دو ممبران کی حمایت مل گئی جس کے بعد ہی اس ترمیمی بل کی شقوں کی منظوری ممکن ہو سکی۔
وزیرقانون اعظم نذیر تارڑ نے 27 ویں آئینی ترمیمی بل منظوری کے لیے پیش کیا جس کے بعد اس کی شق وار منظوری کا عمل جاری ہے۔
سینیٹ میں آئینی ترمیمی بل کو دو تہائی اکثریت کے ساتھ منظور کرنے کے لیے حکومت کو 64 ووٹ درکار تھے اور اتنے ہی ووٹوں سے اس بل کے مختلف شقوں کو منظور کیا گیا ہے۔
سینیٹ میں 64 ارکان نے بل کے حق میں ووٹ دے دیے ہیں۔ اپوزیشن کی طرف سے ایوان کی کاررائی کا بائیکاٹ کیا گیا اور اپوزیشن ایوان سے واک آؤٹ کرگئی۔ تاہم پی ٹی آئی کے سینیٹر سیف اللہ ابڑو اور
جمیعت علمائے اسلام کے سینیٹر احمد علی خان اپوزیشن کے احتجاج کا حصہ نہیں بنے اور اس ترمیمی بل کے حق میں ووٹ کاسٹ کیے۔
