اردن کے فرمانروا شاہ عبداللہ دو روزہ دورے پر پاکستان پہنچ گئے
وزیراعظم شہباز شریف کی دعوت پر اردن کے فرمانروا شاہ عبداللہ دوم دو روزہ دورے پر سنیچر کو اسلام آباد پہنچے۔
نور خان ایئربیس آمد پر پاکستان کے صدر آصف علی زرداری، وزیراعظم شہباز شریف، وفاقی کابینہ کے ارکان اور دیگر حکومتی شخصیات نے شاہ عبداللہ دوم اور ان کے اعلٰی سطح کے وفد کا استقبال کیا۔
اردن کے فرمانروا بعدازاں وزیراعظم ہاؤس پہنچے جہاں ان کے اعزاز میں باضابطہ استقبالیہ تقریب منعقد کی گئی۔ اس موقعے پر دونوں ممالک کے قومی ترانے بجائے گئے جبکہ مسلح افواج کے دستے نے انہیں سلامی پیش کی۔
وزیراعظم شہباز شریف نے اپنی کابینہ کے ارکان کا شاہ عبداللہ دوم سے تعارف کرایا۔ اس کے بعد اردن کے فرمانروا نے وزیراعظم ہاؤس کے احاطے میں ایک پودا بھی لگایا۔
ایوانِ صدر میں ایک خصوصی تقریب بھی منعقد ہو گی، جس میں شاہ عبداللہ دوم کو پاکستان کا اعلٰی ترین سول ایوارڈ عطا کیا جائے گا۔
بیان کے مطابق شاہ عبداللہ دوم کا یہ دورہ پاکستان اور اردن کے درمیان دیرینہ برادرانہ تعلقات کا مظہر ہے۔ اس دورے سے دونوں ممالک کے سیاسی، اقتصادی اور ثقافتی روابط مزید مستحکم ہوں گے۔
وزیراعظم ہاؤس میں شاہ عبداللہ دوم کی وزیراعظم شہباز شریف سے ون آن ون ملاقات ہو گی اور وفود کی سطح پر بھی بات چیت ہو گی۔
شاہ عبداللہ دوم کا یہ دورہ پاکستان اور اردن کے دیرینہ تعلقات کو مزید مضبوط کرنے اور دونوں برادر ممالک کے درمیان دوطرفہ تعاون کے دائرہ کار کو وسیع کرنے کا موجب بنے گا۔
