سہ ملکی ٹورنامنت کے لیے ٹیم میں کوئی بڑی تبدیلی نہیں ہوگی: کپتان سلمان علی آغا

پاکستان ٹی20 کرکٹ ٹیم کے کپتان سلمان علی آغا نے کہا ہے کہ ایک روزہ فارمیٹ میں ٹیم کی کارکردگی کافی بہتر رہی ہے اور اب بھی ٹیم میں کسی بڑی تبدیلی کا ارادہ نہیں۔

پیر کو پنڈی کرکٹ سٹیڈیم میں پاکستان، سری لنکا اور زمبابوبے کے درمیان سہ ملکی ٹی20 سیریز سے قبل پریس کانفرنس میں انہوں نے کہا کہ ’جو حکمتِ عملی گزشتہ میچز میں کامیاب رہی ہے، اسے ہی آگے لے کر چلیں گے۔‘

سلمان آغا کے مطابق ’گزشتہ تین سے چار ماہ سے ٹیم آل راؤنڈرز پر انحصار کر رہی ہے اور محمد نواز اور فہیم اشرف مکمل آل راؤنڈرز کے طور پر دستیاب ہیں، جو مکمل چار اوورز بھی کر سکتے ہیں اور بیٹنگ بھی کرتے ہیں، اس لیے انہیں بھرپور استعمال کیا جائے گا۔‘

انہوں نے کہا کہ ’صائم ایوب بھی کافی عرصے سے اچھی بولنگ کر رہے ہیں اور کوشش ہوتی ہے کہ وہ اور میں دونوں بولنگ کریں۔‘

کپتان نے مزید کہا کہ ’نچلے نمبرز پر ٹیم کی کارکردگی بری نہیں، تاہم مڈل آرڈر کو مزید بہتر ہونے کی ضرورت ہے۔‘

ان کا کہنا تھا کہ عبدالصمد کو فنشر کے طور پر استعمال کیا جائے گا جبکہ جن کھلاڑیوں کو موقع نہیں ملا، انہیں ٹرائی سیریز میں کھلایا جائے گا کیونکہ 12 کھلاڑی ایک ساتھ نہیں کھیل سکتے۔‘

اپنی کارکردگی سے متعلق بات کرتے ہوئے انہوں نے کہا کہ ایشیا کپ کے دوران وہ درست فریم آف مائنڈ میں نہیں تھے، تاہم اب وہ لیفٹ آرم بیٹرز کے خلاف بولنگ بھی کریں گے۔

سلمان علی آغا نے پنڈی سٹڈیم کے کراؤڈ کی تعریف کرتے ہوئے کہا کہ ’راولپنڈی کرکٹ سٹیڈیم ہمیشہ ہاؤس فل ہوتا ہے اور وہاں کے شائقین ہمیشہ بڑی تعداد میں آتے ہیں۔‘

ٹی20 کرکٹ پر بات کرتے ہوئے انہوں نے کہا کہ ’اس فارمیٹ میں کسی بھی ٹیم کو ہلکا نہیں لیا جا سکتا۔‘

’وائٹ بال سیریز میں ٹیم اچھا مومینٹم حاصل کر چکی ہے اور کوشش یہی ہوگی کہ اسے برقرار رکھا جائے۔ کرکٹ کیریئر میں اتار چڑھاؤ آتے رہتے ہیں لیکن ٹیم مکمل اعتماد کے ساتھ آگے بڑھ رہی ہے۔‘

یاد رہے کہ پاکستان، سری لنکا اور زمبابوے کے درمیان ٹی20 سیزیز 18 نومبر سے 28 نومبر تک پنڈی کرکٹ سٹیڈیم میں کھیلی جائے گی۔