Sorry, you need to enable JavaScript to visit this website.

حوثیوں نے مسجدِ نبوی کو بجلی فراہم کرنے والے مدینہ کے پاور سٹیشن کو نشانہ بنایا: عرب اتحاد

یہ مسلمانوں کے جذبات کو دانستہ بھڑکانے کی مسلسل اور دانستہ کوشش ہے( فوٹو: ایس پی اے)
اتحادی فورسز کے سرکاری ترجمان میجر جنرل ترکی المالکی نے کہا ہے کہ ’حوثیوں نے منگل کی صبح 5 بجکر 11 منٹ پر مدینہ منورہ میں واقع بجلی کی تقسیم کے ایک سٹیشن کو نشانہ بنایا ہے۔‘
 ترجمان نے کہا کہ ’ متعلقہ حکام کی تحقیقات اور حاصل کردہ شواہد نے حوثی ملیشیا کی اس ’بزدلانہ دہشت گردانہ‘ کارروائی کی منصوبہ بندی اور اس میں ملوث ہونے کو ثابت کیا ہے جس کی تصدیق آپریشنل جائزے اور حملے میں استعمال کیے جانے والے ڈرون کے ملبے سے ہوئی ہے۔‘
ایس پی اے کے مطابق میجر جنرل ترکی المالکی نے بتایا دہشت گرد حملے میں ایک ٹرانسفارمر آؤٹ آف آڈر ہو گیا تاہم بجلی کا گرڈ متاثر نہیں ہوا۔
ترجمان نے کہا مدینہ منورہ میں مسجد نبوی کو بجلی کی خدمات فراہم کرنے والی ایک سول تنصیب کو نشانہ بنانے کی یہ ’بزدلانہ دہشت گردانہ‘ کارروائی حوثیوں کی جانب سے مقدس مساجد کو نشانہ بنائے جانے کی کوششوں کا تسلسل ہے۔‘
انہوں نے کہا ’اس طرح کے حملے مکہ اور مدینہ کو نشانہ بنا کر دنیا بھر کے کروڑوں مسلمانوں کے جذبات کو بھڑکانے کی ایک مسلسل اور دانستہ کوشش بھی ہے۔
میجر جنرل ترکی المالکی نے اتحاد کی جانب سے حوثی دہشت گرد ملیشیا کو روکنے، دو مقدس مساجد کے تحفظ ، مکہ اور مدینہ میں زائرین کے تحفظ کو یقینی بنانے کے لیے تمام ضروری اقدامات جاری رکھنے کے عزم کا اعادہ کیا۔
اس سے قبل سعودی فضائی دفاعی نظام نے منگل 15 ستمبر کو مکہ مکرمہ کی فضائی حدود میں داخل ہونے کی کوشش کرنے والے ایک ڈرون کو تباہ کیا تھا۔
 اتحادی فورسز کے ترجمان میجر جنرل ترکی المالکی نے بیان میں کہا  تھا کہ یہ اقدام سرخ لکیر(ریڈ لائن) ہے۔ ضروری اور سخت اقدامات کرنے سے نہیں ہچکچائیں گے۔
مکہ اسلام کا مقدس ترین مقام ہے اور ایران کی حمایت یافتہ گروپ کے اس اقدام سے دنیا بھر کے مسلمانوں کے جذبات مجروح ہونے کا امکان ہے۔

 سعودی فضائی دفاعی نظام نے منگل 15 ستمبر کو مکہ  کی فضائی حدود میں داخل ہونے کی کوشش کرنے والے ایک ڈرون کو تباہ کیا تھا۔(فوٹو: ایس پی اے)

اتحادی فورسز کے مطابق 2017 میں بھی سعودی فضائی دفاعی نظام نے حوثی ملیشیا کی جانب سے مکہ کی سمت داغے جانے والے ایک بیلسٹک میزائل کو انٹرسیپٹ کیا تھا۔
یہ میزائل طائف کے علاقے الوصلیہ کے اوپر مار گرایا گیا تھا۔ اس واقعے میں کسی نقصان یا زخمی ہونے کی اطلاع نہیں ملی تھی۔

 

شیئر: