ایشیئن گیمز کرکٹ فائنل: روایتی حریف انڈیا اور پاکستان آمنے سامنے

روایتی حریف پاکستان اور انڈیا ایشیئن گیمز کرکٹ میں ایک دوسرے کے مقابل آ گئے ہیں۔

دونوں ٹیموں نے جمعرات کو سیمی فائنلز میں اپنے اپنے حریفوں کو بہ آسانی شکست دی اور فائنل میں پہنچے۔

 انڈیا نے سری لنکا کو 124 رنز سے ہرایا جبکہ پاکستان نے بنگلہ دیش کو چھ وکٹوں سے شکست دی تھی۔

پاکستان اور انڈیا کے درمیان فائنل سنیچر کو ناگویا کے کوروگی ایتھلیٹک پارک سٹیڈیم میں کھیلا جائے گا۔

پاکستان بمقابلہ بنگلہ دیش

کرک انفو کے مطابق پاکستانی بلے باز عبدالصمد نے جارحارنہ سٹروکس کھیلتے ہوئے اپنی ٹیم کو بنگلہ دیش کے خلاف فتح دلائی اور اس کے ساتھ ہی پاکستان نے گولڈل میچ میں جگہ بنا لی۔

عبدالصمد نے 15 گیندوں پر 30 رنز بنائے جن میں پانچ چوکے اور ایک چھکا شامل تھا۔

عبدالصمد اور حسن نواز نے پانچویں وکٹ کے لیے ناقابل شکست 59 رنز کی شراکت داری قائم کی۔ حسن نواز نے 22 گیندوں پر 27 رنز بنائے اور پاکستان کو اس وقت جیت تک پہنچایا جب ابھی نو گیندیں باقی تھیں۔

تاہم یہ جیت زیادہ آسان بھی نہیں تھی کیونکہ اس سے قبل پاکستانی بلے باز کافی پریشان رہے اور اچھی شروعات کے بعد بھی وکٹیں تیزی سے گریں۔

انڈیا اور سری لنکا کا میچ

پہلے بیٹنگ کرتے ہوئے انڈیا نے ایک تیز پچ پر سات وکٹوں کے نقصان پر 169 رنز بنائے۔

سری لنکا نے بغیر کوئی رن بنائے 2 وکٹیں گنوا دیں اور 10 اوورز سے بھی کم وقت میں صرف 45 رنز پر پوری ٹیم آؤٹ ہو گئی۔ اس دوران 3 کھلاڑی رن آؤٹ ہوئے۔

یہ مردوں کے ٹی20 انٹرنیشنل میں سری لنکا کا سب سے کم سکور ہے۔ اس سے قبل اس کا کم ترین سکور 2024 میں نیویارک میں جنوبی افریقا کے خلاف 77 رنز تھا۔

سری لنکا نے ٹاس جیت کر پہلے فیلڈنگ کا فیصلہ کیا جس کے دوران ایشین گیمز میں ڈیبیو کرنے والے 15 سالہ ویبھو سوریہ ونشی کی جارحانہ بیٹنگ بھی سامنے آئی۔

اس سال آئی پی ایل میں سب سے زیادہ رنز بنانے والے اس نوجوان بلے باز نے صرف 21 گیندوں پر 38 رنز بنائے، جس میں چھ چوکے اور 2 زبردست چھکے شامل تھے، تاہم بیک ورڈ پوائنٹ پر کیچ دے بیٹھے۔

انڈیا کی جانب سے ایشان کشن نمایاں بلے باز رہے انہوں نے پانچ چھکوں کی مدد سے ناقابل شکست 80 رنز بنائے۔

سری لنکا کی بیٹنگ شروع ہوئی تو انڈین فاسٹ بولر جسپریت بمراہ نے پہلے ہی اوور میں دو وکٹیں حاصل کر لیں۔

چوتھے اوور کے اختتام تک سری لنکا کا سکور 18 رنز تھا جبکہ پانچ وکٹیں گر چکی تھیں جن  میں سے دو سپنر اکشر پٹیل نے حاصل کیں۔

نووائیدو فرنینڈو نے تیز کھیلنے کی کوشش میں دو چھکے لگائے مگر اس کے فوراً بعد آؤٹ ہو گئے، سری لنکا کی آخری تین وکٹیں تین گیندوں پر گریں۔

پاکستان اور انڈیا کے مقابل آنے پر کرکٹ شائقین میں کافی جوش و خروش دیکھنے میں آ رہا ہے جس کا اظہار وہ سوشل میڈیا پوسٹس میں کر رہے ہیں۔