تین ملکی سیریز: زمبابوے کو شکست، پاکستان نے فائنل کے لیے کوالیفائی کر لیا

سہ ملکی ٹی20 سیریز کے چوتھے میچ میں پاکستان نے زمبابوے کو 69 رنز سے شکست دے کر سیریز کے فائنل کے لیے کوالیفائی کر لیا ہے۔ 

اتوار کو پنڈی کرکٹ سٹیڈیم میں پاکستان کے 196 رنز کے ہدف کے جواب میں زمبابوے کی پوری ٹیم 19 اوورز میں 126 رنز بنا کر آؤٹ ہو گئی۔

پاکستان کی جانب سے بیٹنگ کے بعد بولنگ میں بھی عمدہ کارکردگی کا مظاہرہ کیا گیا۔ پاکستانی بولرز کے سامنے زمبابوے کے بیٹرز ریت کی دیوار ثابت ہوئے۔

پاکستان کی جانب سے عثمان طارق نے ہیٹرک کرتے ہوئے چار وکٹیں حاصل کیں اور پاکستان کے لیے ٹی20 انٹرنیشنل میچ میں ہیٹرک کرنے والے چوتھے کھلاڑی بن گئے۔

اسی طرح سے بیٹنگ سائڈ میں بابر اعظم نے 74 اور صاحبزادہ فرحان نے 63 رنز کی شاندار اننگز کھیلی۔ 

اس سے قبل پاکستان نے پہلے کھیلتے ہوئے مقررہ 20 اوورز میں پانچ وکٹوں کے نقصان پر 195 رنز بنائے تھے۔

زمبابوے کی اننگز 

زمبابوے نے اننگز کا مایوس کن آغاز کیا، شروعات سے ہی زمبابوے کے بیٹرز پریشر میں نظر آئے۔

زمبابوے کی جانب سے سکندر رضا اور ریان برل کے علاوہ کوئی بھی بیٹر ڈبل فیگر میں داخل نہیں ہو سکا۔

سکندر رضا 23 اور ریان برل 67 شاندار رنز بنا کر آؤٹ ہوئے۔

پاکستان کی جانب سے عثمان طارق نے چار، محمد نواز نے دو جبکہ نسیم شاہ، محمد وسیم اور فہیم اشرف نے ایک ایک وکٹ حاصل کی۔

پاکستان کی اننگز

پاکستان نے ٹاس جیت کر بیٹنگ کا آغاز کیا تو صائم ایوب اور صاحبزادہ فرحان کریز پر اترے۔ 

پاکستان کو پہلا نقصان صائم ایوب کی صورت میں تیسرے اوور میں اس وقت ہوا جب ٹیم کا مجموعی سکور 29 رنز تھے۔ وہ 13 رنز بنا کر آؤٹ ہوئے۔

اس کے بعد صاحبزادہ فرحان نے عمدہ بیٹنگ کا مظاہرہ کرتے ہوئے تین چھکے اور چار چوکوں کی مدد سے 63 رنز بنائے، اور 15 ویں اوور میں پویلین لوٹے۔

بابر اعظم ایک مرتبہ پھر عمدہ اننگز کھیلنے میں کامیاب ہوئے، وہ سات چوکوں اور دو چھکوں کی مدد سے 74 رنز بنا کر آؤٹ ہوئے۔

ان کے علاوہ پاکستان کی جانب سے محمد نواز چار، فہیم اشرف تین رنز بنا کر آؤٹ ہوئے جبکہ کپتان سلمان علی آغا ایک اور  فخر زمان 27 رنز کے ساتھ ناٹ آؤٹ رہے۔

یاد رہے کہ اس سے پہلے دو میچز میں پاکستان سری لنکا اور زمبابوے کو شکست دے چکا ہے یوں پاکستان سب سے زیادہ فتوحات کے ساتھ پوائنٹس ٹیبل سرفہرست ہے۔

پاکستان کی پلیئنگ الیون

اس میچ میں پاکستان کی پلیئنگ الیون سلیمان علی آغا (کپتان)، صاحبزادہ فرحان، صائم ایوب، بابر اعظم ،فخرزمان، عثمان خان ،محمد نواز ،فہیم اشرف، نسیم شاہ، محمد وسیم جونیئر اور عثمان طارق پر مشتمل تھی۔

زمبابوے کی پلیئنگ الیون

اس میچ میں زمبابوے کی پلیئنگ الیون میں سکندر رضا (کپتان)، برین بینیٹ، ریان برل، بریڈلی ایونز، ولنگٹن ماساکدزا، ٹینوٹنڈا ماپوسا، ٹیڈیوانشے مرومانی، تاشنگا مسکیوا، ٹونی منیونگا، رچرڈ نگاروا اور برینڈن ٹیلر شامل تھے۔