پاکستان میں تین ملکی سیریز کے لیے سری لنکن ٹیم اسلام آباد پہنچ گئی

سری لنکن کرکٹ ٹیم پاکستان کے خلاف تین او ڈی آئی سیریز اور سہ فریقی ٹی 20 سیریز میں حصہ لینے کے لیے اتوار کو کپتان چریتھ سالنکا کی قیادت میں اسلام آباد پہنچ گئی ہے۔

پاکستان کرکٹ بورڈ (پی سی بی) کے اتوار کو جاری ہونے والے ایک بیان میں بتایا گیا کہ سری لنکن کرکٹ ٹیم کا اسلام آباد انٹرنیشنل ایئر پورٹ پر استقبال کیا گیا۔

ٹی 20 ٹرائنگولر سیریز راولپنڈی اور لاہور میں 17 سے 29 نومبر تک کھیلی جائے گی۔

پاکستان میں شیڈول تین ملکی سیریز میں میزبان پاکستان کے علاوہ سری لنکا اور زمبابوے کی ٹیمیں حصہ لیں گی۔

اس سے قبل پاکستان اور سری لنکا کے ساتھ تیسری ٹیم افغانستان تھی تاہم کشیدہ صورت حال کے باعث افغان کرکٹ بورڈ نے اپنی ٹیم کو بھیجنے سے انکار کردیا۔

پی سی بی کے بیان کے مطابق پاکستان اور سری لنکا کے درمیان تین ون ڈے انٹرنیشنل میچوں کی سیریز 11 سے 15 نومبر کے درمیان راولپنڈی کرکٹ سٹیڈیم میں کھیلی جائے گی۔

جمعے کو سری لنکا نے راولپنڈی اور لاہور میں ہونے والی تین ملکی ٹی20 سیریز اور پاکستان کے خلاف تین ایک روزہ میچز کی سیریز کے لیے 16 رکنی سکواڈ کا اعلان کیا تھا۔

سکواڈ کی قیادت چریتھ اسالانکا کریں گے۔ انہیں تین ملکی ٹی20 سیریز اور پاکستان کے خلاف تین ون ڈے میچز کی سیریز کے لیے قیادت کی ذمہ داری سونپی گئی ہے۔

محکمہ داخلہ پنجاب کے مطابق پاک فوج اور رینجرز کی ایک ایک کمپنی لاہور میں تعینات کی جائے گی جبکہ فول پروف سکیورٹی کو یقینی بنانے کے لیے تین تین کمپنیاں راولپنڈی میں تعینات کی جا رہی ہیں۔  

اس کے علاوہ آرمی ایوی ایشن کے ہیلی کاپٹر فضائی نگرانی میں معاونت کریں گے جب کہ فوجی دستے آئین کے آرٹیکل 245 اور پاکستان رینجرز آرڈیننس 1959 کے تحت تعینات کیے جائیں گے۔